Аляксандр Лукашэнка падтрымаў прапанову ўвесці завочнае вядзенне ў крымінальных справах у дачыненні абвінавачаных, якія жывуць за межамі Беларусі, паведамляе БелТА.
Распрацаваны адпаведны законапраект, які ў бліжэйшы час будзе накіраваны ў Палату прадстаўнікоў. Пра гэта 8 лютага распавёў старшыня Следчага камітэту Дзмітрый Гара на Савеце бяспекі з удзелам Аляксандра Лукашэнкі.
Кіраўнік СК патлумачыў, што апошнім часам шэраг краінаў, у прыватнасці, Польшча, Літва адмаўляюць Беларусі ў выдачы асобаў, якія, паводле ўладаў Беларусі, учынілі злачынствы на тэрыторыі Беларусі, у тым ліку – экстрэмісцкія.
«Дзеля таго, каб рэалізаваць прынцып непазбежнасці крымінальнай адказнасці, уносіцца прапанова разглядаць у судах крымінальныя справы ў дачыненні такіх асобаў у выпадку, калі нам адмоўлена ў іх выдачы ці калі не паступала адказу на запыт аб выдачы, у завочным парадку, то бок без удзелу асобы, у дачыненні якой разглядаецца крымінальная справа», – патлумачыў Дзмітрый Гара.
Лукашэнка падтрымаў гэты законапраект, і бліжэйшым часам дакумент будзе накіраваны ў Савет Міністраў для ўнясення на разгляд Палаты прадстаўнікоў Нацыянальнага сходу.
ГГ, belsat.eu