Паслявыбарчыя пратэсты ў Беларусі працягваюцца ўжо амаль 6 месяцаў. На працягу гэтага часу беларусы патрабуюць адстаўкі Лукашэнкі, спыніць гвалт і прыцягнуць да адказнасці вінаватых у фальсіфікацыях і катаваннях. «Белсат» падводзіць вынікі гэтага 184-га дня пратэстаў.
ЗША заклікаюць улады Беларусі вызваліць журналістак Дар’ю Чульцову і Кацярыну Андрэеву.
«Злучаныя Штаты, краіны-партнёры і праваабарончыя арганізацыі па ўсім свеце лічаць гэтыя абвінавачанні абуральнымі. Журналісткі асвятлялі развіццё падзеяў для беларускага народу. Злучаныя Штаты заклікаюць беларускія ўлады вызваліць іх неадкладна і безумоўна, а таксама, у больш шырокім кантэксце, спыніць пераслед журналістаў, якія робяць сваю працу», – гаворыцца ў заяве амбасады.
Дэпутат фракцыі Сейму «Звяз Бацькаўшчыны – Літоўскія хрысціянскія дэмакраты» Даля Асанавічуце (Dalia Asanavičiūtė) разам з дэпутатам Еўрапарламенту Пятрасам Аўштравічусам (Petras Auštrevičius) заклікалі ўлады Беларусі спыніць пераслед журналістаў з палітычных матываў і неадкладна вызваліць журналістак «Белсату» Кацярыну Андрэеву і Дарʼю Чульцову.
Літоўскія палітыкі сімвалічна ўзялі апеку над журналісткамі.
«Рэжым Лукашэнкі кропкава пераследуе журналістаў, каб іх запалохаць і прымусіць маўчаць. Арышт журналістак Кацярыны Андрэевай і Дарʼі Чульцовай не мае пад сабою законных падставаў, абвінавачанні сфабрыкаваныя, таму журналісткі павінны быць неадкладна вызваленыя. Толькі перамога дэмакратычнай апазіцыі ў Беларусі прынясе істотныя змены ў сітуацыю з правамі і свабодамі чалавека ў краіне», – заявіў Пятрас Аўштравічус.
«Журналісткі Дарʼя і Кацярына былі зўзятыя пад варту толькі за трансляцыю з мірнага пратэсту. Складана ўсвядоміць, што каля межаў Літвы адбываюцца такія рэчы. Я хачу выказаць усё магчымае падтрыманне журналісткам, а таксама паведаміць свету пра жорсткую рэальнасць, у якой сёння жывуць беларусы, каторыя прагнуць свабоды. Дарʼя і Кацярына ўвасабляюць сабою свабоду слова, здушэнне якой – недапушчальнае парушэнне дэмакратычных свабодаў», – сказала Даля Асанавічуце.
Да 13 лютага беларусы змогуць прагаласаваць за народных прадстаўнікоў праз рэсурс «Сход: платформа народных прадстаўнікоў». Дэлегаты пасля галасавання атрымаюць права публічна выказваць меркаванне людзей аб найбольш актуальных для краіны праблемах. Некаторыя палітычныя аглядальнікі лічаць, што платформа «Сход» – альтэрнатыва дзяржаўнаму Усебеларускаму народнаму сходу. Розніца ж у тым, што дэлегатаў абіраюць зацікаўленыя беларусы, і дэлегаты, адпаведна, будуць выказваць інтарэсы грамадзянаў, а не наменклатуры.
Прагаласаваць можна онлайн з любога месца Беларусі. Аддаць свой голас можна толькі за аднаго кандыдата.
9 лютага спаўняецца шэсць месяцаў з пачатку масавых антыўладных выступаў. Напярэдадні гэтай даты «Amnesty International» выступіла з заявай, у якой сцвярджаецца, што ўлады Беларусі абыходзяцца з дзецьмі непрымальным чынам. Некаторыя сядзяць за кратамі, ім агучылі сфабрыкаваныя крымінальныя абвінавачанні.
«Дзецям ва ўзросце ад васьмі гадоў у школах пагражалі, што з іхнымі палітычна актыўнымі бацькамі расправяцца. Адной з самых падступных формаў пераследу і запалохвання застаецца пагроза выкарыстання заканадаўства, каб забраць дзяцей з семʼяў і перадаць іх пад апеку дзяржавы, што фактычна робіць іх закладнікамі дзяржавы», – кажа Айша Джанг, старэйшая кіраўніца кампаніяў «Amnesty International» у Беларусі.
Грамадская арганізацыя прыводзіць прыклады, калі затрыманых падлеткаў амапаўцы жорстка збівалі і катавалі.
Сёння ўдзень журналісты «Белсату» Любоў Лунёва і Дзмітрый Солтан перасталі выходзіць на сувязь. Журналістаў затрымалі. Паводле папярэдняй інфармацыі, затрымлівалі нашых калегаў працаўнікі Савецкага РУУС.
Журналісты «Белсату» Любоў Лунёва і Дзмітрый Солтан застаюцца на Акрэсціна.
СК belsat.eu