Памежны камітэт Беларусі сцвярджае, што толькі тры з дзевяці еўрапейскіх пунктаў пропуску выканалі дамоўленасці аб афармленні грузавікоў за мінулыя содні. З пачатку снежня чэргі з фураў сталі большымі яшчэ на 20 %.
Самым загружаным застаецца літоўскі кірунак. Памежны камітэт піша, што за содні праз «Меднікі» (з беларускага боку – «Каменны Лог») у Літву ўехалі толькі 248 фураў, што ў два разы менш за прапускную здольнасць памежнага пераходу. Агулам на літоўскім кірунку выезду чакаюць амаль 2200 фураў.
На польскіх памежных пераходах нібыта цяпер афармляюць каля 70 % фураў ад усталяванай нормы, у выніку на мяжы з Польшчай таксама назіраецца вялікая колькасць грузавікоў – іх там цяпер 1720.
Да латышскіх памежных пераходаў беларускі памежны камітэт прэтэнзіяў не мае, аднак кажа, што з-за пераразмеркавання транспартавых плыняў з найбольш загружаных маршрутаў і на мяжы з Латвіяй павялічылася колькасць грузавікоў, якія чакаюць выезду – цяпер там 1090 фураў.
Кіроўцы фураў распавядаюць, што ў чарзе даводзіцца стаяць па пяць содняў і больш, піша радыё «Свабода». Пры гэтым на мяжы адсутнічаюць неабходныя побытавыя ўмовы: кіроўцы мыюцца на вуліцы, ходзяць у прыбіральню «пад кола».
Не дапамагаюць і спецыяльныя пропускі на перавоз тавараў, якія хутка псуюцца, – за такі гадавы дазвол кампаніі плацяць некалькі тысяч долараў. Аднак калі ў адгароджаным калідоры з двухбаковым рухам стаіць глухая чарга, немагчыма аб’ехаць машыны проста фізічна.
ГГ, belsat.eu
