Беларускі добраахвотнік і старшыня «Маладога фронту» Дзяніс Урбановіч, які быў паранены ўчора, 6 лістапада, у баю ва Украіне, цяпер у парадку. Пра гэта Дзяніс сам напісаў на сваёй старонцы ў Facebook.
У Дзяніса Урбановіча было аскепачнае раненне ў руку, вайскоўцу зрабілі аперацыю.
«Ўсім прывітанне! Шаноўная грамада. У мяне ўсё добра, аскепак выцягнулі, адчуваю сябе цудоўна. Дзякуй!!! Ўсім за падтрымку. Перамога будзе за намі. Слава Украіне! Жыве Беларусь!», – напісаў Дзяніс.
Ён ваюе ва Украіне ад самага пачатку вайны. Гэта ўжо другое раненне Дзяніса. У канцы траўня ён быў шпіталізаваны з кантузіяй, два дні быў без прытомнасці. Вядома. што побач з ім выбухнула міна, праз кантузію ён меў праблемы са слыхам.
У Беларусі актывіст Дзяніс Урбановіч прымаў актыўны ўдзел у абароне Курапатаў, адсядзеў 2 гады за акцыю, якую ён з малодшым братам зладзіў на выбарчым участку падчас прэзідэнцкай кампаніі 2015 года.
Пасля прэзідэнцкіх выбараў у 2020 годзе Урбановіча некалькі разоў затрымлівалі па адміністратыўных артыкулах, ён зазнаваў незаконны пераслед, рэпрэсіі і катаванні. У снежні 2021 года ён пад пагрозай крымінальнай справы, якую на яго завялі па артыкуле 342 Крымінальнага кодэксу («Арганізацыя або ўдзел у дзеяннях, якія груба парушаюць грамадскі парадак») выехаў ва Украіну.
З пачатку расейскага ўварвання ва Украіну Дзяніс запісаўся добраахвотнікам ва ўкраінскае войска.
Алена Рувіна belsat.eu