Уладзімір Пуцін уладарыць даўжэй за Леаніда Брэжнева і ўжо перажыў Юрыя Андропава. Засталося нядоўга да Іосіфа Сталіна.
Уладзіміру Пуціну споўнілася 70 гадоў: цяперашні кіраўнік Расеі нарадзіўся 7 кастрычніка 1952 года ў Ленінградзе (цяпер Санкт-Пецярбург).
Чаканая працягласць жыцця пры нараджэнні ў Расеі летась якраз складае роўна 70 гадоў. Але Пуцін нарадзіўся значна раней. Статыстыкі чаканай працягласці жыцця няма на гады да 1958-га, а народжаны ў 1958-м мужчына з гарадскога насельніцтва Расеі ў сярэднім жыве 63 гады.
Пуцін кіруе Расеяй з 31 снежня 1999 года. У 2008–2012 гадах прэзідэнтам Расеі быў Дзмітрый Мядзведзеў, а Пуцін – прэм’ер-міністрам. Ды часам аналітыкі і палітолагі сумняюцца ў тым, што Мядзведзеў быў самастойным прэзідэнтам. Зрэшты, Мядзведзеў прабыў усяго адзін тэрмін на пасадзе прэзідэнта і не стаў балатавацца на другі, саступіўшы Пуціну. Гэтак, Пуцін узначальвае Расею 22 гады «з перапынкам на Мядзведзева».
Гэтыя 22 гады – столькі ж, колькі кіраваў імператар Мікалай II, і ўжо больш, чым быў ва ўладзе Леанід Брэжнеў (18 гадоў), але менш за Іосіфа Сталіна (30 гадоў на пасадзе генеральнага сакратара ЦК Камуністычнай партыі, але з іх каля 8 гадоў ішло змаганне за ўладу з іншымі камуністычнымі лідарамі). Пуцін ужо старэйшы за Юрыя Андропава – аднаго з удзельнікаў нефармальнай «гонкі на лафетах» (серыі смерцяў старых камуністычных лідараў у 1980-я).
Сярод кіраўнікоў Расеі былі і доўгажыхары: апошні кіраўнік СССР Міхаіл Гарбачоў дажыў да 91 года, а міністр – старшыня Часовага ўраду Аляксандр Керанскі – да 89 гадоў, што фенаменальна для народжанага ў канцы XIX стагоддзя.
У Расеі існуе напалову жартаўлівая заканамернасць «лысы – валасаты»: ужо дзве сотні гадоў, яшчэ ад Мікалая I, пасля кіраўніка Расеі з вялікаю колькасцю валасоў на галаве прыходзіць амаль што лысы кіраўнік, за ім – зноў валасаты. Пуціна адносяць да лысых. Калі традыцыя не парушыцца, то наступным кіраваць Расеяй мае хтосьці валасаты.
Алесь Наваборскі belsat.eu