Паводле звестак Сусветнай арганізацыі здароўя (САЗ), да 20 % людзей, якія перахварэлі на COVID-19, пакутуюць ад постковіднага сіндрому.
Вызначэнне афіцыйнага апісання сіндрому дала рабочая група медыкаў і экспертаў САЗ ды навучальных установаў на аснове апытанняў і аналізу стану некалькіх сотняў пацыентаў у розных краінах свету.
«Постковідны стан сустракаецца ў пацыентаў, якія перанеслі інфекцыю SARS-CoV-2. Сімптомы гэтага стану звычайна трымаюцца каля трох месяцаў з пачатку захворвання на COVID-19 і не могуць быць растлумачаныя іншымі дыягназамі», – гаворыцца ў дакуменце.
Прыкметы постковіднага сіндрому: падвышаная стамляльнасць, нястача кіслароду, кагнітыўны разлад і некаторыя іншыя сімптомы, якія могуць аслабляцца або абвастрацца час ад часу.
«Мы даём вызначэнне клінічнага выпадку стану пасля COVID-19, якое будзе ўжывацца ў грамадстве ды ўстановах аховы здароўя для аптымізацыі распазнавання і догляду за асобамі, якія перажылі наступствы COVID-19. Гэтае вызначэнне можа змяняцца ў парадку з’яўлення новых доказаў, і нашае разуменне наступстваў COVID-19 развіваецца», – падкрэсліваюць у справаздачы САЗ.
МГМ belsat.eu
