Палітвязень Зміцер Фурманаў ужо другі месяц знаходзіцца ў штрафным ізалятары калоніі №3 на Віцебшчыне, паведамляе карэспандэнт «Белсату».
Пасля вынясення прысуду Зміцер Фурманаў быў пераведзены ў калонію №3, г.п. Віцьба, але так і не зʼявіўся ў атрадзе. Палітвязень прыбыў у калонію ў жніўні і пасля каранціну быў адразу змешчаны ў ШІЗА, дзе па невядомых прычынах знаходзіцца да гэтай пары.
Родныя Фурманава занепакоеныя гэтай сітуацыяй. Заўтра, 8 кастрычніка, у калонію паедзе бацька палітвязня, Аляксандр Фурманаў. Ён просіць падтрымання і агалоскі. Дабірацца будзе з Горадні на грамадскім транспарце, разлічвае быць у г.п. Віцьба раніцай. Ён будзе вельмі ўдзячны, калі яго змогуць сустрэць і падвезці да калоніі, а таксама маральна падтрымаць там.
Зміцер Фурманаў – сябра ініцыятыўнай групы па вылучэнні ў прэзідэнты Святланы Ціханоўскай. Быў затрыманы падчас выбарчага пікету ў Горадні 29 мая 2020 пры зборы подпісаў разам з Сяргеем Ціханоўскім і іншымі актывістамі.
Асуджаны паводле ч. 1 арт. 342 КК (Арганізацыя і падрыхтоўка дзеянняў, якія груба парушаюць грамадскі парадак) да 2 гадоў пазбаўлення волі ў калоніі агульнага рэжыму.
СП belsat.eu
