З пачатку навучальнага года ў некаторых прыватных школах заняткі так і не пачаліся – іх накрыла хваля праверак. Некаторым прыватным школам выдалі прадпісанне аб прыпыненні працы, зараз яны ў экстраным парадку выпраўляюць выяўленыя парушэнні. Тым часам бацькам пачалі паступаць званкі з прапановамі аддаць дзяцей у дзяржшколы, піша «Onliner».
Бацька вучня прыватнай менскай школы распавёў, што па словах адміністрацыі праз праверкі шанцаў адкрыцца ў школы ў бліжэйшы час няма.
«Была праверка, і тыя патрабаванні па будынку, якія прад’яўляе камісія, выканаць нерэальна. Нам адкрытым тэкстам раяць забіраць дакументы і шукаць іншую школу», – перадае словы адміністрацыі бацька.
Ён пачаў абзвоньваць іншыя прыватныя школы ў Савецкім раёне Менску, аднак у іх заняткі ў класах таксама не пачаліся. Сітуацыя там аналагічная: ёсць пытанні з боку правяраючых органаў. У большасці сваёй парушэнні выяўлены некрытычныя – іх можна ліквідаваць за тыдзень-два, чым адміністрацыі школ і заняліся ў экстраным парадку.
Прадстаўнік іншай прыватнай школы, дзе дзеці таксама не змаглі своечасова пачаць вучобу, распавёў, што «ва ўсіх такая сітуацыя»:
«Наколькі я ведаю, у Менску адкрыліся адзінкавыя школы (ну, максімум 10). Нам увесь час тэлефануюць людзі, пытаюцца, ці ёсць месцы, просяць зрабіць броню. Канешне, я думаю, што бацькоўскі адток будзе, калі школа не адкрыецца ў бліжэйшы час. Пытанне толькі, куды ўсе гэтыя дзеці пойдуць. Не ўпэўненая, што яны змогуць размеркавацца па іншых прыватных школах».
Заснавальнік Менскай мужчынскай гімназіі пацвярджае: з-за праверак дзеці не могуць пачаць вучобу, а ў школу сёлета набралі больш за 1000 чалавек. Заняткі мусілі пачацца 5 верасня, але пакуль і адміністрацыя, і бацькі знаходзяцца ў падвешаным стане.
Па словах адміністрацыі гімназіі, правяраючых вельмі шмат, знаходзяць самыя розныя парушэнні, напрыклад пажарная інструкцыя не ў тым фармаце раздрукаваная: павінна быць A3, а не A4. Ці няма палічкі ў кладоўках. І такіх дробных заўваг шмат. Таксама гімназіі прапанавалі перадаць спісы вучняў і іх бацькоў, каб дзяцей можна было размеркаваць па дзяржшколах, але там не сталі дзяліцца гэтымі дадзенымі.
На сайце Камітэту па адукацыі вывешаны спіс менскіх прыватных школ – паводле звестак на 31 жніўня, з двух дзясяткаў толькі чатыры атрымалі сертыфікаты гатоўнасці да пачатку навучальнага года.
«Нават калі сертыфікат не быў падпісаны, школам раней не забаранялі працаваць», – расказвае прадстаўнік прыватнай школы.
У гэтым годзе планавыя праверкі ў школах сталі перамяшчаць на канец жніўня, хоць раней яны заканчваліся да 20-га чысла. Дадаткова ў прыватныя школы прыходзілі з маніторынгамі з МНС і Цэнтру гігіены і эпідэміялогіі.
Алена Рувіна belsat.eu