Адзінарос Турчак прапанаваў правесці 4 лістапада рэферэндумы на акупаваных тэрыторыях Украіны
Сакратар генеральнага савету расейскай партыі ««Единая Россия»» Андрэй Турчак прапанаваў правесці 4 лістапада рэферэндумы на акупаваных расейскімі войскамі тэрыторыях Украіны. Дарадца гарадскога галавы Марыупалю яму адказаў.
Турчак напісаў у сваім Telegram-канале, што рэферэндумы ў Данбасе і на кантраляваных суседніх тэрыторыях «правільна правесці 4 лістапада, у Дзень народнага адзінства».
З ягоных словаў, рэферэндумы дакладна адбудуцца сёлета. У сваім тэксце ён спасылаецца на сацыялагічнае даследаванне пры нібыта гатоўнасць жыхароў Данбасу і іншых тэрыторыяў «стаць часткай вялікай Расеі».
Планы правядзення псеўдарэферэндуму пракаментаваў таксама ў Telegram-канале дарадца гарадскога галавы Марыупалю Пётр Андрушчанка:
«Як мы ўжо неаднаразова казалі, самая вялікая арганізацыйная праблема расейцаў – адрозненне паміж акупаванымі Данецкай, Луганскай вобласцямі і часткамі Харкаўскай, Херсонскай і Запарожскай вобласці».
Андрушчанка лічыць, што расейскі рэжым відавочна мае разлік агучыць вынікі «рэферэндумаў», калі яны адбудуцца, і сваё рашэнне 7 лістапада – у дзень бальшавіцкага перавароту. «Такое сабе адраджэнне СССР», – адзначыў дарадца. Але, на ягоную думку, гэта дакладна не апошняя дата, якую агучваюць акупанты.
Антон Тачняк belsat.eu
