Беларускія ўлады прынялі рашэнне пакінуць у дыпламатычным прадстаўніцтве Літвы ў нашай краіне аднаго супрацоўніка консульскай службы і трох супрацоўнікаў адміністратыўна-тэхнічнага персаналу, паведамляе БелТА са спасылкай на прэс-службу Міністэрства замежных спраў.
Скарачэнне амбасады стала адказам на наданне дыпламатычнага статусу офісу Святланы Ціханоўскай у Вільні. 6 ліпеня Міністэрства замежных спраў Беларусі выклікала часовую павераную ў справах Літоўскай Рэспублікі ў Беларусі Асту Андрыяўскене. У ведамстве літоўскаму дыпламату паведамілі, што афіцыйны Менск лічыць непрымальным «надзяленне некіх эфемерных структураў у выглядзе офісу так званага «Беларускага дэмакратычнага прадстаўніцтва» у Вільні афіцыйным дыпламатычным статусам».
Таксама ў МЗС адзначылі, што наданне дыпстатусу офісу Святланы Ціханоўскай «працягвае серыю недарэчных і адкрыта варожых крокаў, якія апошнім часам прадпрыняла афіцыйная Вільня, і якія наўпрост супярэчаць духу і ўзроўню добрасуседскіх адносінаў і падрываюць двухбаковае супрацоўніцтва».
Літоўскаму дыпламату паведамілі пра рашэнне скараціць да мінімуму амбасаду Літвы ў Беларусі да адмены Літвой «несяброўскіх ініцыятываў, якія распальваюць канфрантацыю ў адносінах з Беларуссю».
МЗС Літвы ў сваю чаргу заявіла, што рыхтуе меры ў адказ на дзеянні Менску.
Віцэ-міністр замежных справаў Літвы Мантас Адоменас у інтэрв’ю тэлеканалу LRT сказаў, што скарачэнне дыпламатычнага прадстаўніцтва Літвы, пры якім застаецца толькі адзін консульскі супрацоўнік, азначае фактычнае закрыццё амбасады.
5 ліпеня офіс лідара беларускай апазіцыі, былой кандыдаткі ў прэзідэнты Беларусі Святланы Ціханоўскай у Вільні атрымаў дыпламатычны статус. Літва першай з краінаў Еўразвязу пайшла на такі крок.
Раней беларускія ўлады ўжо скарацілі амбасаду Латвіі, пакінуўшы там аднаго супрацоўніка.
ГГ, belsat.eu