Раніцай 7 чэрвеня рэдакцыі «Новага часу» стала вядома, што РУП «Белпошта» выключыла газету з падпіснога каталогу на другое паўгоддзе.
Гэта значыць, што падпісацца на газету «Новы час» праз аддзяленне альбо сайт «Белпошты» больш не атрымаецца.
Вечарам 4 чэрвеня чытачы газеты сталі паведамляць, што не могуць падпісацца на «Новы час» ні праз інтэрнэт, ні ў паштовых аддзяленнях. Па тэлефоне гарачай лініі ў пятніцу рэдакцыі паведамілі, што, магчыма, мае месца тэхнічная памылка.
Але ранкам 7 чэрвеня прадстаўнікі аддзелу падпіскі «Белпошты» па тэлефоне паведамілі: «Так, мы прынялі рашэнне не працягваць з вамі супрацоўніцтва. Мы адправілі вам ліст». Высветлілася, што насамрэч ліст толькі збіраюцца адправіць.
На «Белпошце» запэўнілі, што ўсім, хто ўжо аформіў падпіску на 2-е паўгоддзе, вернуць грошы.
Да нядаўняга часу ўсе палітвязні былі падпісаныя на «Новы час», але ім перасталі дастаўляць газету. Гэты азначае, што цяпер зняволеныя фактычна пазбаўленыя магчымасці атрымліваць інфармацыю з незалежных медыяў.
Рэдакцыя «Новага часу» заклікае ўсіх, хто хацеў бы падтрымаць газету і застацца яе чытачом, паведаміць адрасы для падпіскі. Гэта можна зрабіць па тэлефоне рэдакцыі (+375 29 625 57 51) ці праз бот @NovyChas_bot (трэба пазначыць: прозвішча, імя, імя па бацьку і адрас (паштовы індэкс, вуліца, дом, кватэра).
Таксама вы можаце падтрымаць газету падпіскай у розных сацыяльных сетках.
АД, belsat.eu