Пратэст у Беларусі працягваецца 272 дні. У краіне не спыняюцца палітычныя рэпрэсіі, але і не спыняецца ціск на рэжым у краіне і за яе межамі. Падводзім вынікі дня.
У судзе Маскоўскага раёну Берасця 7 траўня вынесеныя прысуды па трэцім працэсе гэтак званай карагоднай справе: асудзілі яшчэ 14 чалавек. Выракі – «хатняя хімія», рэальнае абмежаванне і пазбаўленне волі.
Менскі абласны суд 7 траўня вынес вырак у крымінальнай справе тэлеграм-каналу «Армия с народом». Выракі – ад 4,5 да 6 гадоў пазбаўлення волі.
Не спыняюцца і ўжо звыклыя адміністрацыйныя працэсы: відэааператара асудзілі на 15 содняў арышту і штраф за «незаконную журналісцкую дзейнасць», жыхарку Ждановічаў двойчы асудзілі на содні за малюнак сэрцайка ў ліфце… але за кнігу «Беларуская нацыянальная ідэя» асудзіць не змаглі: пакуль суддзя чытаў гэтую кнігу, мінуў час, калі падсуднага можна было пакараць.
Палітвязнем 7 траўня прызналі Аляксандра Кардзюкова – сведку забойства Генадзя Шутава. Днём раней у спіс палітвязняў дадалі Арцёма Баярскага, якога вінавацяць у адміністраванні пабліку «Мая краіна Беларусь».
Аляксандр Лукашэнка выказаўся наконт падачы заявы супраць яго ў пракуратуру Нямеччыны ад імя дзесяці беларусаў: «Не нашчадкі фашызму мяне будуць судзіць. Хто вы такія, каб мяне судзіць!?» – звярнуўся ён да немцаў.
Тым часам Сямён Шарэцкі, былы старшыня Вярхоўнага савету Беларусі XIII склікання, запісаў віншаванне з Днём Перамогі, у якім асудзіў Лукашэнку і назваў яго «барацьбітам за гітлераўскія парадкі».
Аляксандр Лукашэнка 7 траўня заявіў, што беларускія навукоўцы ўжо атрымалі сваю вакцыну ад COVID-19, і што «яна ўжо ў прабірцы». Аднак з таго, што расказаў галоўны санітарны лекар Беларусі, вынікае, што да выкарыстання вакцыны яшчэ далёка: не было нават выпрабаванняў «у прабірцы».
7 траўня Святлана Ціханоўская выступіла на канферэнцыі Сейму Літоўскай Рэспублікі, прысвечанай свабодзе слова пры аўтарытарызме ў Беларусі. На канферэнцыі абмяркоўваліся правы чалавека, свабода масавай інфармацыі і будучыня Беларусі. Сярод удзельнікаў былі еўрапейскія палітыкі ды эксперты, прадстаўнікі АБСЕ і розных НДА, беларускія і замежныя журналісты.
Калі не ведаеце, мы пералічылі шэсць надзейных VPN-сервісаў і завялі новы сайт-люстэрка Beltv.info.
АА belsat.eu