Амерыканскія сенатары ўхвалілі законапраект аб праграме ленд-лізу для Украіны. Дакумент быў унесены ў сенат яшчэ да пачатку вайны ва Украіне.
Ленд-ліз – праграма, у межах якой ЗША здавалі ў арэнду або перадавалі ў доўгатэрміновы крэдыт вайсковую тэхніку і рыштунак супольнікам падчас Другой сусветнай вайны. За 1941–1945 гады Вашынгтон перадаў сваім супольнікам матэрыялаў на больш як $ 50 млрд, у тым ліку СССР – каля $ 11 млрд.
У канцы студзеня, пасля з’яўлення ў медыях паведамленняў аб рыхтаванні Масквой уварвання ва Украіну, сенатары ад Дэмакратычнай і Рэспубліканскай партыяў падрыхтавалі законапраект, які надае прэзідэнту ЗША пашыраныя паўнамоцтвы заключаць пагадненні з украінскімі ўладамі на пастаўкі ўзбраенняў для абароны насельніцтва Украіны ад расейскага ваеннага ўварвання. Ён дазволіць кіраўніку дзяржавы абыходзіць бюракратычныя перашкоды, што паскорыць дастаўку зброі.
Дзеянне пашыраных паўнамоцтваў прэзідэнта ЗША заканчваецца ў выпадку спынення вайны, што цягнецца з акупацыі Расеяй Крыму ў 2014 годзе, і скарачэння колькасці расейскіх войскаў пры ўкраінскай мяжы да стану сакавіка 2021 года.
Цяпер дакумент мусіць ухваліць Палата прадстаўнікоў. Пасля законапраект будзе накіраваны на подпіс прэзідэнту.
ПС belsat.eu
