Адтэрміноўкі ад войска айцішнікам і індэксацыя пенсіяў. Урад Беларусі зацвердзіў план падтрымання эканомікі
Савет міністраў Беларусі зацвердзіў план падтрымання эканомікі. Адпаведны дакумент падпісаў прэм’ер Раман Галоўчанка.
План прадугледжвае падтрыманне экспарту і пашырэнне крэдытавання экспарцёраў незалежна ад рынку паставак беларускай прадукцыі. Таксама зніжаюцца мытныя пошліны для імпартных тавараў, неабходных для вытворчасці на экспарт.
Запланаваная магчымасць рэструктурызацыі запазычанасці і выплаты пеняў па мытных плацяжах, выбудоўванне новых транспартна-лагістычных ланцужкоў для перанакіравання экспартных патокаў.
Прапануецца праца з РФ у пытаннях павелічэння квотаў і ў перспектыве адмену дазвольнай сістэмы перавозак грузаў і кабатажу для беларускіх аўтаперавозчыкаў. Агулам з Расеяй плануецца стварыць сумесныя імпартазамяшчальныя вытворчасці і дадаткова фінансаваць падтрымліваць малыя і сярэднія прадпрыемствы, якія выпускаюць прадукцыю, што не вырабляецца ў Беларусі і Расеі.
Таксама план прадугледжвае вызваленне бізнесу ад адміністрацыйнай адказнасці ў выніку праверак за ўпершыню дапушчаныя і ненаўмысныя парушэнні і наданне арганізацыям права на атрыманне субсідыяў з ФСАН для ажыццяўлення даплат работнікам, а таксама дзяржаўнай штомесячнай адраснай сацыяльнай дапамогі некаторым катэгорыям грамадзянаў. Грашовыя даходы, пенсіі, дапамогі будуць індэксавацца да ўзроўню інфляцыі.
Апроч таго, прапісаная магчымасць надання рэзідэнтам ПВТ ільготаў і прэферэнцыяў, у тым ліку правы на адтэрміноўку ад прызыву на вайсковую службу.
Таксама ў дакумент уключаныя меры падтрымання прамысловасці, будаўнічай галіны, сельскай гаспадаркі, транспарту і турызму.
ПС belsat.eu
