У персанал адной змены на ЧАЭС уваходзіць 95 спецыялістаў, плюс пажарныя і медыкі. Яны заступілі на сваю змену 23 лютага. Пасля захопу станцыі расейскімі войскамі 24 лютага новая змена да гэтай пары так іх і не замяніла. На момант уварвання на станцыі таксама знаходзіліся 4 сталкеры.
Станцыю ахоўвалі 150 нацыянальных гвардзейцаў Украіны, аднак яны апынуліся бяссільнымі супраць расейскай браніраванай цяжкай тэхнікі. Лёс усіх гэтых людзей да гэтай пары дакладна невядомы. Вядома, што ўвесь персанал станцыі трымаюць у закладніках, каб ЧАЭС працягвала працаваць у планам рэжыме. Але колькі яны змогуць так працаваць без падмены на небяспечных аб’ектах? Прэс-служба станцыі маўчыць ад дня захопу.
Разам з тым, пасля захопу расейскімі войскамі Запарожскай АЭС зʼявілася здагадка аб тым, што на ёй могуць знаходзіцца супрацоўнікі Росатаму, якія кантралююць працу станцыі. Так, кіраўнік украінскага «Энергаатаму» Пётр Коцін пасля захопу ЗАЭС у каментары СМІ адзначыў, што «персонал ЗАЕС працює під контролем військових, є військовий начальник, з яким повинен узгоджувати всі свої дії професійний персонал атомної станції щодо управління енергоблоками. Зараз персонал атомної станції займається усуненням наслідків обстрілів з боку РФ».
Такі «начальнік» дакладна мусіць быць адмыслоўцам, які разумее, што і як працуе. А значыць, на станцыі могуць знаходзіцца супрацоўнікі Росатаму.
Калі гэта так, магчыма, супрацоўнікі Росатаму ёсць і на ЧАЭС. Атрымаць афіцыйны каментар адносна гэтага ў Росатаме нам не ўдалося – тэлефоны прэс-службы маўчаць.
СК, belsat.eu
