Расея ўсцяж наносіць ракетныя ўдары па ўкраінскіх гарадах з тэрыторыі Беларусі. Пра гэта гаворыцца ў аператыўнай інфармацыі Генеральнага штабу Узброеных сілаў Украіны станам на 6:00 7 сакавіка.
«Супернік працягвае наступальную аперацыю супраць Украіны. З пачатку содняў расейскі акупант працягнуў наносіць ракетна-бомбавыя ды артылерыйскія ўдары па паселішчах Украіны. Захопнікі працягваюць выкарыстоўваць аэрадромную сетку Рэспублікі Беларусь для нанясення авіяўдараў па Украіне», – адзначаюць у паведамленні.
Таксама гаворыцца пра шматлікія выпадкі пастановачных рэпартажаў для расейскіх тэлеканалаў пра нібыта гуманнасць і чалавечнасць жаўнераў з РФ.
«Групоўка Сілаў абароны Украіны ажыццяўляе абарончую аперацыю на ўсіх напрамках вылучэння суперніка. Вораг працягвае зазнаваць вялікія страты ў жывой сіле, наземнай тэхніцы і сродках паветранага нападзення. Здаецца ў палон», – адзначаецца ў паведамленні.
Украінскі і заходні бакі неаднаразова заяўлялі, што з боку Беларусі ляцяць ва Украіну ракеты і ў нашай краіне знаходзіць прытулак расейская авіяцыя, адказная за абстрэлы ўкраінскай тэрыторыі. Тым цікавей было даведацца пра месца нараджэння беларускага генерала, адказнага за ВПС і ПВА Ігара Голуба. Ён нарадзіўся ў памежным з Беларуссю Чарнігаве і скончыў тамсама вайсковую вучэльню. Цяпер жа пры ягоным беспасярэднім удзеле (ці прынамсі несупраціўленні) абстрэльваюць у тым ліку і ягоны родны Чарнігаў.
ПС belsat.eu