Беларусь і Расея анансавалі падпісанне дакументу аб накіраванні да 200 беларускіх ваенных у Сірыю
Прэм’ер-міністр расейскага ўраду Міхаіл Мішусцін даручыў Міністэрству абароны і МЗС Расеі правесці перамовы ды падпісаць з Беларуссю пагадненне, якое прадугледжвае супрацоўніцтва ў сферы аказання гуманітарнай дапамогі Сірыі.
Для гэтага плануецца прыцягнуць да 200 беларускіх вайскоўцаў. Распараджэнне апублікавана на расейскім афіцыйным інтэрнэт-партале прававой інфармацыі.
Згодна з дакументам беларускія ваенныя будуць прыцягнуты ў Сірыю для выканання задач «выключна ў гуманітарных мэтах па-за зонай баявых дзеянняў», а склад, колькасць, структура і задачы беларускага воінскага кантынгенту вызначаюцца Беларуссю і ўзгадняюцца з Расеяй.
Падчас знаходжання ў Сірыі беларускія вайскоўцы будуць размяшчацца ў месцах дыслакацыі расейскай авіяцыйнай групы і падпарадкоўвацца Цэнтру ўзброеных сіл РФ, але пры гэтым заставацца пад камандаваннем упаўнаважанага беларускага органа.
Цяпер жа беларуская Канстытуцыя не дазваляе дасылаць ваенны кантынгент у іншыя краіны. Таксама раней Лукашэнка заяўляў, што ён не будзе адпраўляць беларускіх салдат у Сірыю.
АД, belsat.eu
