Прапанова назваць адну з вуліц у Астраўцы імем Адама Мальдзіса прагучала з вуснаў намесніка старшыні Астравецкага райвыканкаму Генадзя Бычко 5 студзеня падчас пахавання славутага навукоўцы і пісьменніка ў вёсцы Задворнікі на Астравеччыне, піша «Астравецкая праўда».
«Думаю, будзе правільна, калі адну з вуліц Астраўца мы назавём імем Адама Мальдзіса. Трэба падумаць і пра мемарыяльную дошку ці бюст, прысвечаны нашаму слыннаму земляку», – сказаў у развітальнай прамове Генадзь Бычко.
Сябры і паплечнікі Адама Мальдзіса падкрэслілі, у сваю чаргу, што найлепшым помнікам славутаму суайчынніку стане перавыданне ягоных твораў, запіс успамінаў – і сваё слова ў гэтай важнай справе павінны сказаць жыхары Астравеччыны, якіх ён так любіў.
Беларускага літаратуразнаўцы, журналіста, гісторыка і пісьменніка Адама Мальдзіса не стала 3 студзеня. Развітанне з прафесарам адбылося 5 студзеня ў менскім касцёле Святых Сымона і Алены. Яго пахавалі ў вёсцы Задворнікі на Астравеччыне.
ЗК belsat.eu