Польшча, Чэхія, Славаччына і Вугоршчына зладзілі буйныя вайсковыя вучэнні блізу мяжы з Украінай
Вучэнні Вышаградскай групы «Puma-22» пачаліся 4 лістапада і будуць працягвацца да 9-га. На вучэннях абапіраюцца на досвед і ўрокі вайны ва Украіне, расказвае «Polska Agencja Prasowa».
«Puma-22» – найбуйнейшыя манеўры краінаў Вышаградскай групы ў гэтым годзе. Яны праходзяць на палігоне ў Новай Дэмбе, што блізу Жэшава, за 110 км ад мяжы з Украінай.
У вучэннях бяруць удзел каля 2000 вайскоўцаў (у тым ліку саюзнікі са Злучаных Штатаў і Вялікай Брытаніі, якія ўжо знаходзіліся ў Падкарпацці) і каля 300 адзінак тэхнікі. Паралельна з гэтымі вучэннямі ладзяцца тры камандна-штабныя: «System–22», «Gepard–22» i «San–22».
Мэтай вучэнняў называюць падвышэнне «інтэраперацыйнасці» войскаў – праверку здольнасці да планавання і арганізацыі дзеянняў супольна з саюзнікамі. Сёлетнія вучэнні адрозніваюцца ад ранейшых, бо ўлічваюць досвед вайны ва Украіне.
Сцэнары вучэнняў уключаюць манеўраную абарону, фарсаванне ракі, ліквідацыю хімічнага заражэння, выклік артылерыйскага агню і інтэграванае вядзенне агню, медычную эвакуацыю. Страляць маюць польскія танкі «Леапард», брытанскія «Чэленджэр» і чэшскія Т-72.
Алесь Наваборскі belsat.eu
