Міліцыянты патрабуюць ад асуджанай за абразу супрацоўніка Івацэвіцкага РАУС афіцыйнага працаўладкавання. Вользе К. прысудзілі 2 гады «хатняй хіміі» і 2 тысячы рублёў у якасці маральнага кампенсавання. Жанчына, якая сама выхоўвае дзіця, зарэгістраваная рамесніцай. Раней міліцыянтаў гэта задавальняла, але раптам ёй сталі пагражаць калоніяй у выпадку, калі яна не ўладкуецца на працу.
Івацэвіцкі суд прысудзіў мясцовай жыхарцы Вользе К. 2 гады «хатняй хіміі» і 2 тысячы рулёў у якасці маральнага кампенсавання. Падставай для справы стаў допіс у Telegram-канале, дзе жанчына паставіла пад фотаздымкам міліцыянта Івацэвіцкага РАУС Руслана Куцко смайлік какашка.
«Я выконваю ўсе іх патрабаванні. Учора выклікаў інспектар, і пачалося: другі дзень выносіць мозг, што я самазанятая і аформілася як рамеснік. Калі мяне ставілі на ўлік, пытанняў не было. А ўчора і сёння ён патрабуе, каб я знайшла працу, маўляў, тое што я рамеснік і працую седзячы дома, іх гэта не задавальняе. А калі гэта парушу мне пакаранне зменяць на больш жорсткае», – кажа Вольга.
Жанчына распавядае, што міліцыянты пагражаюць змясціць яе ў калонію, калі яна не працаўладкуецца. Пры гэтым знайсці працу, тым больш асуджанай, у невялікім горадзе даволі складана. Жанчыну асудзілі 4 жніўня. Але патрабаванне з’явілася 5 лістапада.
СК belsat.eu