26 чэрвеня ў баях пад Лісічанскам загінуў камандзір батальёну «Волат» палка Кастуся Каліноўскага Іван Марчук з пазыўным Брэст. За дзень да гібелі з 28-гадовым ваяром паразмаўляла радыё «Свабода».
«Цяпер усё прыходзіць да нейкай лагічнай развязкі, таму я ва Украіне, дзе паставіў усё на кон, застаючыся ў небяспецы як з боку КДБ, гэтак і з боку ворагаў-расейцаў», – распавёў камандзір.
Беларус з 2015 года заставаўся ў зоне антытэрарыстычнай аперацыі.
«Як было не паехаць? Ужо тады было зразумела, у якое рэчышча гэта пойдзе. Былі спадзяванні, што гэта ўсё не перарасце ў нешта поўнамаштабнае. Але ўжо тады АТА была высакароднай справай у абароне братоў ад неправамернай агрэсіі. І ўжо тады было зразумела, што Расея спрабуе ўсталёўваць на тых тэрыторыях незразумелы рэжым, дзе творыцца беззаконне», – казаў Брэст.
Але цяпер, паводле яго, маштаб вайны «зусім іншы».
«Тады не было такога, каб усё вакол выбухала, каб працавалі адначасова і артылерыя, і авіяцыя, і танкі, і пяхота. Узровень ворага цяпер зусім ужо іншы», – распавёў ваяр.
Таксама ён некаторы час служыў у французскім Замежным легіёне:
«Было выдатнае рыхтаванне, цяпер гэта вельмі заўважна. Гэта дапамагае мне захоўваць жыцці хлопцаў і дзейнічаць максімальна абазнана».
26 чэрвеня ў баях пад Лісічанскам знікла сувязь з некаторымі байцамі беларускага палка Кастуся Каліноўскага. Як паведамілі ў фармаванні, пазней стала вядома, што загінуў камандзір батальёна «Волат» Іван Марчук з пазыўным Брэст, а Ян Дзюрбейка з пазыўным Тромблі трапіў у расейскі палон.
Дагэтуль невядома, дзе цяпер яшчэ шэраг беларускіх ваяроў.
Якуб Хруст belsat.eu