Грамадская арганізацыя «Libereco» звярнулася з лістом да швейцарскага вытворцы харчоў «Nestlé» з заклікам спыніць аплату за рэкламу на прапагандысцкім тэлебачанні Беларусі. «Nestlé» адрэагавала на зварот і абвесціла пра скарачэнне рэкламнага бюджэту на беларускім дзяржаўным тэлебачанні, паведамляе нямецкае выданне «RedaktionsNetzwerk Deutschland».
Нямецкае выданне піша, што ў Беларусі грамадзяне даўно крытыкуюць заходнія кампаніі, якія рэкламуюць на дзяржаўным прапагандысцкім тэлебачанні свае тавары. А менавіта дзяржаўнае тэлебачанне транслюе «прызнанні» зняволеных грамадзянаў, каб запалохаць іншых.
І аплата гэтых сюжэтаў ідзе не толькі з бюджэту краіны, але і за кошт рэкламы. Сярод найбуйнейшых тэлерэкламадаўцаў у Беларусі – швейцарская харчовая кампанія«Nestlé».
Нямецка-швейцарская арганізацыя «Libereco» звянулася з адкрытым лістом да кіраўніцтва кампаніі «Nestlé». У лісце, які падтрымалі і падпісалі таксама 52 няўрадавыя арганізацыі з 18 краінаў, грамадзянская супольнасць заклікае неадкладна спыніць рэкламу «Nestlé» «на ўсіх падкантрольных дзяржаве беларускіх сродках масавай інфармацыі і звязанае з гэтым фінансаванне прапаганды злачыннага рэжыму».
Аўтары звароту, які таксама падпісала арганізацыя «Рэпарцёры без межаў», крытыкуюць «Nestlé» за рэкламу кавы, шакаладных батончыкаў і ежы побач з жудаснаю дэманстрацыяй праціўнікаў рэжыму.
Адметна, што раней у кампаніі «Nestlé» не каментавалі гэтых абвінавачанняў. Але 5 чэрвеня адказалі, што ўважліва адсочваюць падзеі ў Беларусі:
«Адсутнасць альтэрнатыўных тэлеканалаў і шырокі асартымент прадукцыі прывялі да выразна прыкметнай прысутнасці брэндаў «Nestlé» на нацыянальных тэлеканалах краіны. Але ў межах рэгулярнага агляду нашай дзейнасці мы цяпер значна скарацілі рэкламны бюджэт у Беларусі».
СК belsat.eu