Вярхоўны суд Беларусі прысудзіў палітыку і экс-банкіру Віктару Бабарыку 14 гадоў турэмнага зняволення. Міжнародная супольнасць асудзіла гэты прысуд і заклікае афіцыйны Менск вызваліць палітвязня. Да гэтага закліку далучылася «Amnesty International».
У адказ на абвінаваўчы прысуд і 14-гадовы тэрмін зняволення, які вынес суд у Беларусі Віктару Бабарыку, «Amnesty International» заклікала ўлады вызваліць вязня сумлення.
«Гэта палітычна матываваны прысуд, які яшчэ больш азмрочвае і без таго змрочную карціну страху і адчаю ў Беларусі. Галасы іншадумства заглушаюцца, бо трывожнае маўчанне прымусова ўводзіць усё больш рэпрэсіўны ўрад.
Віктар Бабарыка стаў мішэнню, бо ён адважыўся кінуць выклік Аляксандру Лукашэнку і цяпер свабодай плаціць за смеласць», – сказала Мары Страдэрз, дырэктар «Amnesty International» па Усходняй Еўропе і Цэнтральнай Азіі
Прадстаўніца «Amnesty International» кажа, што Віктар Бабарыка – вязень сумлення, пераследуецца выключна за мірнае ажыццяўленне правоў чалавека, у тым ліку свабодна выказвае свае палітычныя меркаванні. Яго разам з іншымі арыштаванымі, якія падтрымалі яго падчас прэзідэнцкай кампаніі неабходна неадкладна і безумоўна вызваліць.
Таксама на прысуд адрэагавалі ў Бруселі. Еўразвяз патрабуе вызвалення палітвязняў.
«ЕЗ патрабуе неадкладнага вызвалення Бабарыку, а таксама ўсіх палітычных зняволеных, затрыманых журналістаў і людзей, якія знаходзяцца за кратамі за выказванне сваіх фундаментальных правоў», – гаворыцца ў заяве ЕЗ.
СК belsat.eu