Лідарка дэмакратычных сілаў Беларусі Святлана Ціханоўская 6 красавіка сустрэлася з амбасадарам Еўразвязу ў Беларусі Дыркам Шубэлем.
Падчас сустрэчы яны абмеркавалі сітуацыю ў Беларусі. У шэрагу пытанняў – падтрыманне грамадзянскай супольнасці ў Беларусі і магчымасць супрацы ў будучыні.
Таксама падчас сустрэчы абмяркоўваўся пакет дапамогі беларускай культурнай супольнасці і медыям, што распрацоўваецца для наступных гадоў. Паўстала ў тым ліку і пытанне дыскрымінацыі, з якой сутыкаюцца беларусы з пачаткам вайны ва Украіне, і магчымыя механізмы супрацьстаяння гэтай з’яве.
Ішла гаворка і пра санкцыі супраць Лукашэнкі, ягонага рэжыму і памагатых.
Разам з прадстаўнікамі Чэхіі, Эстоніі і Польшчы каманда Святланы Ціханоўскай працуе ў пытаннях выдачы візаў. Прадстаўнікі краінаў запэўніваюць, што візы беларусам будуць выдавацца, калі ёсць сур’ёзныя матывы выехаць. Турыстычных візаў цяпер гэтыя краіны не выдаюць.