Каманда праекту «Машына дыхае, а я – не» паведаміла праз сацсеткі аб адмене выставы пасля таго, як стала вядома пра затрыманне двух яе арганізатарак.
Учора, 5 красавіка, у другой палове дня ў арганізатарак выставы Наталлі Трэнінай і Таццяны Гацуры-Яворскай прайшлі ператрусы, вынялі тэхніку. Актывісткі затрыманыя і застаюцца ў ІЧУ на Акрэсціна.
«Нам вельмі шкада, але мы вымушаныя спыніць рэалізацыю праграмы праекту «Машына дыхае, а я – не». Мы горача шануем супольнасцю, якая паспела сфармавацца вакол праекту, і шчыра ўдзячныя вам за цікавасць і падтрымку», – напісалі ў Instagram аўтары праекту.
Выстава «Машына дыхае, а я – не», прысвечаная гераізму медыкаў, адкрылася 30 сакавіка і мелася працаваць да 17 красавіка. Але ўжо 1 красавіка ў прастору наведаліся санстанцыя і МНС, якія знайшлі парушэнні і загадалі закрыць экспазіцыю.
АД belsat.eu