Мэркель паабяцала новыя санкцыі ў адказ на парушэнне правоў чалавека ў Беларусі
Нямеччына і Еўразвяз будуць прыцягваць да адказнасці вінаватых у парушэнні правоў чалавека ў Беларусі. Пра гэта заявіла канцлерка Ангела Мэркель у сваім выступе з назвай «Салідарнасць з жанчынамі ды мужчынамі Беларусі».
«Нямеччына і Еўрапейскі звяз і надалей будуць прыцягваць да адказу вінаватых у бесперапынных парушэннях правоў чалавека ў Беларусі, як мы гэта ўжо зрабілі прыняццем санкцыяў ЕЗ», – сказала яна.
Мэркель падкрэсліла, што ані Нямеччына, ані Еўразвяз не прызнаюць вынікі прэзідэнцкіх выбараў у Беларусі ў жніўні 2020 года, бо яны не былі «ні свабоднымі, ні сумленнымі, ні празрыстымі».
Канцлер выказала салідарнасць з удзельнікамі акцый пратэсту «супраць фальсіфікацыі вынікаў выбараў, за палітычныя змены і глыбокія пераўтварэнні ў іх краіне». Пры гэтым яна падкрэсліла, што «дзяржаўнае кіраўніцтва на чале з Аляксандрам Лукашэнкам ведае толькі адзін адказ на мірныя дэманстрацыі – гвалт».
«Разлік уладаў, як здаецца, заключаецца ў надзеі, што свет хутка зноў забудзе гэтых адважных людзей. Мы не павінны гэтага ні ў якім разе дапусціць», – дадала яна.
Мэркель заклікала дзейныя ўлады Беларусі неадкладна спыніць рэпрэсіі і вызваліць палітычных зняволеных, «паважаць, нарэшце, права грамадзян на свабоду выказвання меркавання».
Яна нагадала, што Нямеччына прыняла план падтрымання грамадзянскай супольнасці Беларусі, у рамках якога спрашчаюцца правілы атрымання візаў, прадугледжаныя стыпендыі і падтрыманне незалежных медыяў. Канцлер прызнала, што «гэта не вырашыць канфлікту паміж законнасцю і прыгнётам у Беларусі», бо гэта немагчыма звонку. Але, падкрэсліла Мэркель, «гэта паказвае адважным людзям там, што мы [Нямеччына. – Рэд. Belsat.eu] падтрымліваем і чуем іх голас».
Праўладная Федэрацыя прафсаюзаў Беларусі збірае подпісы пад скаргай у Міжнародную арганізацыю працы. У дакуменце выказваецца нязгода з увядзеннем ЕЗ эканамічных санкцыяў у дачыненні Беларусі.
Але тым працаўнікам, якія адмаўляюцца падпісваць праўладны зварот, пагражаюць праблемамі, пазбаўленнем прэміі ды пуцёвак. Пакуль толькі на словах. Але многія ўсё роўна адмаўляюцца ставіць свой подпіс.
МГ belsat.eu
