Беларускія вайскоўцы выпраўляюцца ў Казахстан у межах «міратворчай місіі» АДКБ, каб падтрымаць барацьбу такаеўцаў з масавымі пратэстамі. Лідарка беларускага пратэсту – супраць.
«Не трэба быць палітыкам ці экспертам, каб разумець: увод войскаў – гэта заўсёды ўзброенае ўмяшанне ў справы іншай дзяржавы, – гаворыцца ў заяве Святланы Ціханоўскай, якую распаўсюдзіў ейны офіс. – Народ Беларусі ніколі не выступіў бы і не выступіць за тое, каб адправіць войска на прыгнечанне волі народу Казахстана».
На думку Ціханоўскай, кожны беларус «сэрцам разумее рашэнне супрацьстаяць дыктатуры» і разумее, што «Лукашэнка, які страціў легітымнасць, не мае права прымаць рашэнні аб уводзе войскаў і ахвяраваць беларусамі дзеля ўзброенай сімуляцыі стабільнасці ў рэгіёне».
«Толькі жыхары Казахстана маюць права вызначаць лёс сваёй краіны і адстойваць свой выбар, – заявіла Ціханоўская. – Выхад на вуліцу – гэта нармальны, а ў аўтарытарных рэжымах адзін з нямногіх даступных грамадзянам спосабаў выказвання сваёй грамадзянскай волі. Я спадзяюся, што пратэстоўцы і ўлады Казахстана знойдуць магчымасці пачаць дыялог і развязаць сітуацыю, не дапускаючы новых ахвяраў».
На вуліцах казахскіх гарадоў 6 студзеня пратэсты сціхаюць. Пратэстоўцы дамагліся зніжэння цэнаў на паліва, адстаўкі ўраду і фармальнага сыходу Нурсултана Назарбаева з пасады старшыні Савету бяспекі. Наступнік Назарбаева Касым-Жамарт Такаеў застаўся на пасадзе прэзідэнта і заняў месца Назарбаева ў Савеце бяспекі.
Дакладная колькасць ахвяраў кахазскага пратэсту невядомая. Паведамлялі пра смерці пратэстоўцаў, улады заяўляюць аб 13 забітых паліцыянтах. У Алматы ноччу і раніцай было чуваць страляніну.
АА belsat.eu