Пратэстоўцы дамагліся зніжэння цэнаў на паліва, адстаўкі ўраду і фармальнага сыходу Нурсултана Назарбаева. А рэжым Такаева атрымаў прысутнасць расейскіх вайскоўцаў.
Праз блакаванне інтэрнэту і праблемы з тэлефоннаю сувяззю інфармацыі з Казахстану 6 студзеня няшмат, яна пераважна паступае з расейскіх дзяржаўных медыяў, ад казахскіх сілавых ведамстваў і прэс-службы кіраўніка Казахстану Касым-Жамарта Такаева.
«Белсат» спытаў, што адбываецца ў краіне, у казахскага праваабаронцы ды прэзідэнта грамадскага фонду «Liberty» Галыма Агелеуава, які на ўласныя вочы бачыў пратэсты ў Алматы.
У Алматы цяпер у некалькіх месцах адбываецца «антытэрарыстычная аперацыя»: затрымліваюць марадзёраў. Уначы Агелеуаў сам бачыў, як рабуюць крамы, у тым ліку білі вітрыны ювелірнай крамы каля ягонага дому, як адтуль выходзілі ўзброеныя людзі.
Галым падкрэслівае, што марадзёры скарысталіся хваляю пратэсту, захапілі зброю, чынілі пагромы, рабаванні і крадзяжы. Яны добра арганізаваныя, але да мітынгоўцаў не маюць аніякага дачынення.
У Алматы цяпер густы туман, вельмі кепская бачнасць. Але выглядае на тое, што менавіта пратэстаў там ужо няма.
На захадзе краіны іншая сітуацыя. Там людзі зноў выходзілі на плошчы з патрабаваннямі дэмакратычных зменаў, але пастанавілі сыходзіць, бо іхныя патрабаванні выканалі: будуць парламенцкія выбары.
У тым, што Нурсултан Назарбаеў, які кіраваў Казахстанам 30 гадоў, цяпер сышоў, Агелеуаў сумняецца: Назарбаеў, падобна, усё яшчэ мае ўладу, уплыў і вялікія грошы, а старая эліта застаецца. Ды Такаеў, хоць і стаўленік Назарбаева, імкнецца паменшыць уплыў ягонай сям’і.
Праблема, кажа праваабаронца, у тым, што краіна выдаткоўвала вялізныя сродкі на сілавікоў, а бюджэт краіны карміў карупцыянераў, звязаных з кланам Назарбаева. Таму і злачынствы, і карупцыя – частка сістэмы першага прэзідэнта.
Неабходнасці ўводзіць войскі АДКБ не было, перакананы Агелеуаў: парадак у краіне можна аднавіць цягам дня, бо большасць актывістаў, якія патрабуюць зменаў у краіне, цяпер разыходзяцца і не бяруць удзелу ў акцыях. Частка насельніцтва выказвае пратэст супраць увядзення войскаў АДКБ, гэта можа толькі падагрэць сітуацыю.
Якая роля АДКБ у гэтым канфлікце – праваабаронцу складана сказаць. Рэч у тым, што ў Казахстане ўсе цудоўна ведаюць, хто ўзначальвае злачынныя групоўкі, што цяпер кіруюць на вуліцах: гэта ўсё ў руках сям’і Назарбаева. Адсюль і загад, каб паліцыі не было на вуліцах гарадоў, і фактычны кантроль злачынных груповак над Алматы.
Улады Казахстану могуць скарыстацца спыненнем пратэстаў, каб пазней абвінаваціць у тэрарызме і экстрэмізме людзей, якія патрабуюць пераменаў. А Крэмль можа ўзмацніць свой уплыў на Казахстан.
АА belsat.eu