«Белыя халаты» распавялі, што не так з афіцыйнай версіяй смерці Дзмітрыя Усхопава

Тэлеграм-канал беларускіх лекараў «Белые Халаты. News» з дапамогай судова-медычнай эксперткі Надзеі Гурманчук пракаментавалі афіцыйныя высновы Следчага камітэту адносна смерці ў навагоднюю ноч затрыманага міліцыянтамі жыхара Рэчыцы Дзмітрыя Усхопава.

Гэтак, з афіцыйных звестак вынікае, што ў крыві Усхопава знойдзены этылавы спірт у колькасці 4,3 праміле, што адпавядае цяжкаму алкагольнаму атручэнню, пры якім можа наступіць смерць. Тым не менш, наяўнасць алкаголю ў гэтай канцэнтрацыі не дае падставы толькі па гэтым паказніку ставіць дыягназ «атручванне», адзначаюць «Белые Халаты. News».

Родных загінулага ў Рэчыцы Дзмітрыя Усхопава эвакуяваў «BySol»

Паводле іх, каб выявіць факт атручэння, неабходнае дбайнае гісталагічнае даследаванне фрагментаў органаў, «што патрабуе часу» і пакуль або не праведзена, або яшчэ не гатовае.

Што датычыць нібыта слядоў тэтрагідраканабінолу (ТГК), то ён можа захоўвацца ў тканінах і органах аж да аднаго месяца з моманту яго ўжывання. Але СК не паведамляе, якой была канцэнтрацыя гэтага рэчыва ў крыві, органах і тканінах Дзмітрыя Усхопава. Таму незразумела, калі ТГК патрапіў у арганізм загінулага і ці быў ён фактарам, праз які наступіла смерць мужчыны.

«Зыходзячы з вышэйпададзенага, дастатковага аб’ёму звестак, якія дазваляюць сцвярджаць аб наяўнасці ў Дзмітрыя Усхопава камбінаванага атручвання алкаголем і тэтрагідракананабінолам няма», – заяўляюць лекары.

Пры гэтым яны задаюцца пытаннем, чаму пры наяўнасці пагрозлівага жыцця стану, які прывёў да смерці, затрыманаму не аказалі своечасова медычную дапамогу.

«Як вядома з афіцыйных дадзеных, Дзмітрый Усхопаў у медычную ўстанову быў дастаўлены ў стане клінічнай смерці. Акрамя таго (што зʼяўляецца абуральным парушэннем) – ён быў дастаўлены ў больніцу на службовай машыне РАУС, а не на хуткай дапамозе.

Супрацоўнікі РАУС павінны былі выклікаць хуткую дапамогу ў РАУС, а не займацца самадзейнасцю і везці чалавека, які памірае, у больніцу. Аднак жа, яны гэтага не зрабілі, што зʼяўляецца найгрубейшай памылкай», – кажуць «Белые Халаты. News».

У СК заявілі, што нібыта выявілі прычыну смерці затрыманага міліцыяй Дзмітрыя Усхопава

Нагадаем, што ў СК заявілі, што, згодна з заключэннем судова-медычнай экспертызы, смерць Дзмітрыя Усхопава наступіла ў выніку камбінаванага атручэння этылавым спіртам і асабліва небяспечным псіхатропным рэчывам – тэтрагідраканнабінолам.

«Таксама пры марфалагічным даследаванні трупа былі выяўлены прыкметы захворванняў сардэчна-сасудзістай сістэмы, якія маглі садзейнічаць наступу смерці ад камбінаванага атручэння», – гаворыцца ў заяве ведамства.

Пры гэтым сваякі ўскладаюць адказнасць за гібель на міліцыю: яны лічаць, што ў будынку РАУС іхнага блізкага збівалі.

Юрыст пра справу Дзмітрыя Усхопава: «Узяты курс на поўную абарону прадстаўнікоў праваахоўных органаў»

МГ belsat.eu

Падпісвайся на telegram Белсату

Hавiны