Літоўская памежная служба адзначае павелічэнне ліку беларусаў, якія ўцякаюць ад пераследу на радзіме. Гэта асобы рознага веку і адукацыі: ад студэнтаў да кіраўнікоў тэатраў, гаворыцца ў рэпартажы тэлерадыёкампаніі LRT з літоўска-беларускай мяжы.
Літоўскія памежнікі заўважылі павелічэнне колькасці беларусаў, якія хаваюцца ад пераследу на радзіме. «У Літву часцей сталі прыязджаць асобы, якія ўцякаюць ад рэжыму незаконна абранага прэзідэнта Аляксандра Лукашэнкі», – гаворыцца ў рэпартажы тэлерадыёкампаніі LRT з літоўска-беларускай мяжы. Паводле памежнікаў, у асноўным бягуць тыя, чый прыгавор не набыў моцы:
«Праз Нёман перапраўляюцца беларусы ў гідракасцюмах. Калі мы не заўважаем, яны самі шукаюць начальства, шукаюць прытулку. Часцей за ўсё, яны паказваюць нейкія дакументы».
Адзін уцякач паказаў пастанову суда, у якой гаворыцца, што ён асуджаны за каментары ў інтэрнэце пра Лукашэнку.
Уцякаюць асобы рознага веку і адукацыі: ад студэнтаў да кіраўнікоў тэатраў. Беларусаў, якім удалося трапіць у Літву, памежнікі перадаюць іншым службам. Пытанне аб прытулку разглядае дэпартамент міграцыі.
«У апошнім выпадку беларус распавёў, што спрабаваў выехаць з сям’ёй у Грузію, але іх не выпусцілі. Нарэшце, як сказаў мужчына, ягоная жонка з дачкой зʼехалі ў Калінінград, а адтуль – у Польшчу. Сам ён спрабуе атрымаць прытулак у Літве», – прывялі падрабязнасці ў памежнай службе.
Сяргей Крот belsat.eu