У Нацыянальным санктуарыі Маці Божай Будслаўскай, дзе пасля пажару быў знішчаны дах і залітае вадой памяшканне касцёлу, паставілі часовы дах, але не паспелі да маразоў завершыць работы з купалам.
Пробашч касцёла, ксёндз Дзмітрый Дубовік расказаў дзяржаўнай газеце «Культура», што ў будучыні металаканструкцыі, якімі замянілі драўляную канструкцыю даху, застануцца, але пакрыццё з металапрофілю з бляхі будзе заменена на меднае, якое было да пажару.
Таксама была зробленая страхоўка пад купалам, бо яго вельмі сур’ёзны стан выклікаў заклапочанасць у інжынераў. Але завершыць работы з купалам не паспелі праз надвор’е. Зрабіць іх плануюць вясной, але на тое спатрэбяцца значныя сродкі. Таксама плануюць раскрыць жывапіс, які ёсць у купальнай частцы.
Цяпер дзеля аднаўлення касцёлу падалі заяўку на распрацоўку інжынернага праекту, у які мае ўваходзіць умацаванне і гідраізаляцыя падмуркаў касцёла, умацаванне цокальнага паверха, пракладка дрэнажнай сістэмы, умацаванне і іншыя працы, звязаныя са шчылінамі ў мурах. Дубовік кажа, што вельмі турбуе правы неф, дзе можа абваліцца частка падпружнай аркі. Праектаванне мае завершыцца ў сярэдзіне 2022 года, рэалізаваць маюць у 2023-24 гадах.
Аднаўляюць касцёл за кошт ахвяраванняў: сабралі ўжо больш за мільён рублёў, але на адраўленне ўсяго даху спатрэбіцца каля 2,2 млн. Збор грошай працягваецца.
Дзеля збору сродкаў ладзілі цэлы музычны марафон «Адбудуем Будслаў разам», які завяршыўся 21 лістапада канцэртам духоўнай музыкі ў выкананні музыкаў парафіі Найсвяцейшай Тройцы (Святога Роха) на Залатой горцы ў Менску.
Зараз суполка аднаўлення касцёлу плануе дабрачынны кірмаш. Пачатак 19 снежня.
Касцёл у Будславе загарэўся раніцай 11 траўня. Пажар удалося патушыць, а таксама ўратаваць галоўны скарб святыні – абраз Маці Божай Будслаўскай. Аднак у касцёле цалкам выгарэў і абваліўся дах.
