Belsat.eu падводзіць вынікі 5 верасня.
Беларуская вершніца Вольга Сафронава атрымала гуманітарную візу ў Польшчы.
Вольга Сафронава з’яўляецца чэмпіёнкай Беларусі па конным спорце. Спартоўка мусіла прадстаўляць Беларусь на Алімпіядзе ў Токіо, аднак была выключаная са складу каманды на падставе заключэння дзяржаўнай камісіі, якая вырашыла, што яе конь нібыта кульгае. Але потым Вольга правяла ў Польшчы адпаведныя абследаванні, якія не пацвердзілі гэтыя высновы. Тады яна зразумела, што камісія наўмысна схлусіла, каб не пусціць яе на Алімпіяду.
«Я падумала, што вяртацца ў Беларусь будзе не зусім бяспечна, таму што я бачу, што адбываецца з іншымі спартоўцамі, якія выказваюць сваю пазіцыю», – распавяла Вольга ў інтэрв’ю «Белсату».
У Вольгі Сафронавай былі падставы меркаваць, што праз сваю грамадзянскую пазіцыю яе могуць пераследаваць. Летась яна апублікавала на сваёй старонцы ў сацсетках допіс пад бел-чырвона-белым сцягам, дзе выказалася наконт падзеяў у Беларусі і адзначыла, што яна на баку народу.
«Мне сказалі, што гэты здымак трэба выдаліць. Я адмовілася гэта зрабіць і атрымала апавяшчэнне пра непадаўжэнне кантракту. Кантракт праз два тыдні быў працягнуты, але пасля гэтага ні на адзін міжнародны старт я так і не выехала», – падкрэсліла яна.
Цяпер спартоўка спадзяецца, што зможа працягнуць карʼеру ў Польшчы.
Увечары 4 верасня пад Воршай адбыліся затрыманні ўдзельнікаў фэсту «Аршанская бітва». Як адзначаецца ў прэс-рэлізе міліцыі, мужчынаў 36, 62 і 64 гадоў затрымалі каля 20:00 гадзінаў у лясным масіве ў Аршанскім раёне «за правядзенне несанкцыянаванага мерапрыемства з выкарыстаннем пратэставай сімволікі».
Паводле праваабаронцаў, у тым ліку быў затрыманы Юрый Копцік – гісторык і адзін з арганізатараў фэсту.
Таксама belsat.eu стала вядома, што ўчора сілавікі прыйшлі на будысцкую імпрэзу «Віпасана» ў аздараўленчым лагеры «Будаўнік» у вёсцы Дудзінка пад Барысавым. На арганізатараў склалі адміністратыўныя пратаколы паводле арт. 24.23 КаАП («Несанкцыянаванае масавае мерапрыемства»).
Раніцай ля прэзідэнцкага палаца ў гвінейскай сталіцы Конакры распачалася моцная страляніна. Паведамлялася, што мяцеж узнялі элітныя падраздзяленні гвінейскага войска на чале з Мамаду Дубуя.
Путчысты па дзяржаўнаму тэлебачанню абвесцілі аб арышце прэзідэнта краіны Альфы Кондэ, закрыцці межаў, роспуску ўрада і парламента, прыпыненні дзеяння канстытуцыі, а таксама намеры ствары пераходны ўрад.
У сеціве з’явіліся відэа і фота прэзідэнта Кондэ нібыта пасля арышту путчыстамі. Аднак сапраўднасць гэтага відэа пакуль не пацверджана.
Між тым, прадстаўнікі ўраду Гвінеі сцвярджаюць, што спроба перавароту была сарваная.
Падрыхтоўка да падпісання інтэграцыйных праграмаў
Першы намеснік прэм’ер-міністра Мікалай Снапкоў заявіў у эфіры тэлеканала «Беларусь 1», што ў інтэграцыйных перамовах Менск і Масква «выйшлі на фінішную прамую».
«На дадзены момант кансэнсус знойдзены па ўсіх 28 саюзных праграмах. У прынцыпе, мы выйшлі на фінішную прамую. Я вельмі спадзяюся, што прэзідэнты нашых краінаў у ходзе сустрэчы 9 верасня ацэняць нашу працу і прымуць рашэнне: ці гатовыя праграмы да падпісання ў тым выглядзе і ў тых канструкцыях, у якіх яны на дадзены момант прадстаўлены ўрадамі», – заявіў Мікалай Снапкоў.
Першы віцэ-прэм’ер падкрэсліў, што праграма па стварэнні адзінага рынку газу таксама гатовая (менавіта вакол гэтай праграмы да апошняга вяліся спрэчкі).
Раман «Рэвалюцыя» беларускага пісьменніка Віктара Марціновіча паставяць у тэатры Schauspielhaus у Гамбургу. Прэмʼера спектаклю адбудзецца ў красавіку 2022 года.
Сёлета кніга Віктара Марціновіча дэ-факта трапіла пад забарону ў Беларусі. У пачатку 2021 года падчас ператрусу ў выдавецтве «Кнігазбор» сілавікі забралі паўтысячы асобнікаў раману «Рэвалюцыя», а беларуская мытня перастала прапускаць кнігу праз мяжу.
ІІ belsat.eu