Вайскоўцы, якія паднялі мяцеж у Гвінеі, заяўляюць пра арышт прэзідэнта краіны Альфы Кондэ. Пра гэта паведамляе BBC.
Раніцай ля прэзідэнцкага палаца ў гвінейскай сталіцы Конакры распачалася моцная страляніна. Паведамлялася, што мяцеж узнялі элітныя падраздзяленні гвінейскага войска на чале з Мамаду Дубуя.
Путчысты па дзяржаўнаму тэлебачанню абвесцілі аб арышце прэзідэнта краіны Альфы Кондэ, закрыцці межаў, роспуску ўрада і парламента, прыпыненні дзеяння канстытуцыі, а таксама намеры ствары пераходны ўрад.
Жыхарам сталіцы загадалі не выходзіць з дамоў, пустыя вуліцы цяпер патрулююць салдаты.
У сеціве з’явіліся відэа і фота прэзідэнта Кондэ нібыта пасля арышту путчыстамі. Аднак сапраўднасць гэтага відэа пакуль не пацверджана.
Між тым, прадстаўнікі ўраду Гвінеі сцвярджаюць, што спроба перавароту была сарваная, паведамляе Reuters.
У мінулым кастрычніку ў краіне прайшлі спрэчныя прэзідэнцкія выбары, па выніку якіх 83-гадовы Альфа Кондэ стаў прэзідэнтам у трэці раз запар (у сакавіку-2020 па выніках рэферэндуму знялі абмежаванні на два тэрміны). Апазіцыя абвінаваціла кіраўніка Гвінеі ў фальсіфікацыях. Пасля гэтага ў краіне распачаліся масавыя акцыі пратэсту.
ІІ belsat.eu
