Супольнасці беларусаў працягваюць ціснуць на ўлады розных краінаў, каб тыя рэагавалі на рэпрэсіі ў Беларусі. А таксама яны робяць акцыі і перформансы, каб паказаць беларусам на радзіме, што пра іх памятаюць і намагаюцца дапамагчы любым дасяжным чынам.
Мы сабралі фота і паведамленні дыяспараў, якія яны дасылаюць нам у рэдакцыю, каб перадаць іх салідарнасць вам.
«Кожны дзень вольныя беларусы Масквы і неабыякавыя расейцы выходзяць, бо да амбасады ўсіх прыцягнуў боль і трагедыя беларускага народу. Хто як можа выражае сваю салідарнасць, дапамогу і таму: «Я – выходжу». У нас мэта адна – падтрымка беларускага народу, мы – голас тых, хто пацярпеў, загінуў, тых, хто проста не можа зараз сам выйсці ў Беларусі. Мы паказваем свету, што беларусы прагнуць Свабоды, памятаюць сваіх Герояў! Перадусім Беларусь!»
«Вольныя беларусы Масквы і неабыякавыя расейцы ўспомнілі, што свае дні народзінаў маглі святкаваць Мікіта Краўцоў і Раман Бандарэнка, але гэтага ніколі не адбудзецца, бо яны былі закатаваныя. Падобны лёс мог напаткаць Крысціну Ціманоўскую, калі яе гвалтоўна хацелі вывезці з алімпіяды ў Токіа! Але супольнымі дзеяннямі беларусы свету здолелі перадухіліць гэта! Разам пераможам! Жыве Беларусь!»
«Спадзяемся на паспяховае вырашэнне сітуацыі для Крысціны. Хунта заяўляе, што спорт па-за палітыкай, але пры гэтым сілком адхіляе спартоўцаў ад выступаў іх мары, толькі за праўду. Мы звяртаемся да ўсёй спартовай супольнасці… Праявіць смеласць і САЛІДАРНАСЦЬ з вашай калегай! Няўжо страх за страту прызавых мацнейшы за жаданне быць сумленным?!»
Абараняючы тых, хто ўдзельнічаў у пратэстах і праходзіў паводле «народнага» артыкулу 23:34, многія адвакаты страцілі ліцэнзію і магчымасць сумленна выконваць сваю працу. Трымаючы партрэт Максіма Знака ад беларускай мастачкі Ганны Радько беларусы Вроцлава нагадалі пра тое, што 4 жніўня пачнецца закрыты працэс над Максімам Знакам, які з верасня 2020 года застаецца за кратамі. Яму пагражае да 12 гадоў турмы. Ён адзін з тых, хто адкрыў беларусам вочы на законы падчас выбарчай кампаніі.
«Мы верым, што хутка ў Беларусі стане да законаў!»
Беларусы Адэсы выйшлі на акцыю памяці.
«Сёння Беларусы Адэсы выйшлі ўшанаваць памяць Віталя Шышова Ён стаў чарговай ахвярай вар’яцкага ўзурпатара, які лічыць асабістым ворагам кожнага, хто не згодны з ім і хто хоча справядлівасці».
Беларусы Масквы на Акцыі смутку ў сувязі з незаменнай стратай, якую панесла наша грамадства – забойствам Віталя Шышова ў Кіеве.
«Яшчэ ўчора мы былі аб’яднаныя надзеяй на тое, што чалавек будзе знойдзены жывым і здаровым… Сёння ж з раніцы страшная вестка павісла цяжкім грузам у нашай свядомасці… Перад вачыма пранесліся, быццам яшчэ нядаўнія, падзеі мінулага года, калі адна за адной усіх шакавалі падобныя ахвяры фашысцкіх душагубаў. Спадзяемся, што гэтае палітычная злачынства стане апошняй кропляй… каб усе аб’ядналіся і зламала нарэшце хрыбет крыважэрнай аграбанде!
Выказваем глыбокія спачуванні ўдаве Віталя, а таксама ўсім родным і блізкім гэтага беларуса. Ён рабіў многа, каб дапамагаць суайчыннікам, якія трапілі пад прэсінг хунты. Твае дзеі заўсёды будуць у памяці абноўленай свабоднай Беларусі, Віталь… Спачывай з мірам».
Беларуска-бельгійскія партызаны здзейснілі дыверсію супраць амбасады Беларусі ў Бельгіі. На брамку амбасады павесілі 2 роварныя замкі. Гэтак адпомсцілі за смерць Віталя Шышова.
Насупраць офісу прэм’ер-міністра Борыса Джонсана актывісты з Беларусі, Гон-Конгу, М’янмы, Венесуэлы, Кубы патрабавалі ад ураду Вялікай Брытаніі паслядоўнай палітыкі ў дачыненні дыктатарскіх рэжымаў.
«Мы з розных краінаў, але нашыя краіны маюць аднолькавыя праблемы. Дыктатары забіваюць свой народ, людзі не маюць свабоды і права голасу, журналісты кінутыя ў турмы… І мы ўсе разам патрабуем, каб дэмакратычны свет адстойваў прынцыпы дэмакратыі не толькі на словах, але ўжываў супраць дыктатараў жорсткія санкцыі».
Гаага. Нідэрланды. Марш Салідарнасці і Свабоды. Вось ужо больш за год беларусы Нідэрландаў выходзяць, каб падтрымаць землякоў і каб Гаагскі трыбунал і міжнародныя арганізацыі не забываліся на беларускае пытанне.
Марш салідарнасці з Беларуссю ў Варшаве.
У Стакгольме прайшла вялікая акцыя падтрымання Беларусі. На мітынгу выступілі дзве міністаркі ўраду Швецыі. Міністарка замежных справаў Ан Ліндэ зазначыла важнае:
«Сфальсіфікаваныя выбары і жорсткі гвалт з боку рэжыму – гэта непрымальна. Швецыя і Еўрапейскі Звяз не прызнаюць перамогі Лукашэнкі ў прэзідэнтскіх выбарах, якія не былі ні свабоднымі, ні справядлівымі. Народ Беларусі мае неад’емнае права выбіраць сваіх лідараў падчас свабодных і дэмакратычных выбараў.
Урад Швецыі сур’ёзна заклапочаны развіццём падзеяў у Беларусі. Як нам усім вядома, апошнім часам сітуацыя працягвае пагаршацца. Беларускі народ, як і любы іншы народ, мае права выбіраць сваіх прадстаўнікоў падчас свабодных і справядлівых выбараў.
Толькі мірныя і дэмакратычныя працэсы, якія падтрымліваюцца моцнай грамадзянскай супольнасцю і асвятляюцца незалежнымі і свабоднымі медыямі, зробяць магчымым надзейнае развязанне той сітуацыі, якая склалася сёння ў Беларусі.
Як будзе выглядаць гэты палітычны транзіт улады, мусіць вызначыць беларускі народ. Але Швецыя і Еўрапейскі Звяз будуць падтрымліваць беларускі народ і грамадзянскую супольнасць Беларусі даступнымі нам шляхамі. Я буду працягваць выступаць за правы чалавека, дэмакратыю і прынцыпы вяршэнства закону ў Беларусі».
У Вільні насупраць амбасады Беларусі ў Літве праходзіць малебен, ініцыяваны літоўскімі вернікамі. Да акцыі далучыліся беларусы і неабыякавыя жыхары Вільні, каб памаліцца за братоў-беларусаў.
Да амбасады Беларусі у Кіеве павесілі пахавальны вянок Лукашэнку ад беларусаў.
Беларуская дыяспара Беластоку арганізавала акцыю «Лукашэнка скраў нашыя галасы!», прымеркаваную да гадавіны выбараў у Беларусі.
Каля 300 асобаў з бел-чырвона-белымі сцягамі, вялікім банерам «Лукашэнка скраў нашыя галасы!», плакатамі ў абарону незалежнасці, партрэтамі забітых і палітвязняў прайшлі маршам па цэнтральных вуліцах Беластоку і правялі сімвалічную акцыю з галасаваннем ля Генеральнага консульства Беларусі.
Маштабная беларуская акцыя ў Лондане. Даўжэзнаму ланцугу салідарнасці не замінаў лонданскі дождж.
Беларусы Філадэльфіі адзначылі гадавіну выбараў і пачатак Рэвалюцыі яднання, стаўшы ў ланцуг салідарнасці з народам Беларусі. Гэты перформанс быў часткай агульнаамерыканскай акцыі, арганізаванай Association of Belarusians in America (ABA).
У гонар першай гадавіны беларускага выбару беларусы Сан-Францыска зладзілі аўтамотапрабег каля Сіці-Голу.
Выйшлі беларусы і ў Таронта.
«Мы сабраліся, каб адзначыць год з дня фальсіфікацыі выбараў 9 жніўня 2020 года. І праз год у нас адно паведамленне: мы не спынімся!!! Мы працягнем барацьбу за свабодную і дэмакратычную будучыню Беларусі!»
У цэнтры Капэнгагену (Данія) на плошчы Конгенс-Нютарв праходзіць акцыя «Mod og Modstand i Belarus» («Смеласць і супраціў Беларусі»). На працягу 20 дзён у розных месцах Капэнгагену праводзіліся гэтая акцыя, выстава і звязаныя з ёй сустрэчы.
Беларуская дыяспара ў Японіі нагадала, што роўна год таму народ Беларусі зрабіў свой выбар: «Нават у нас скралі галасы, як і ў іншых дыяспар у свеце – выбарчы ўчастак не быў нават адчынены. Мы не забудзем і не даруем!»
Наш сцяг быў у гарах, быў на моры… А як вам сцяг на эксперыменце на паскаральніку часціцаў у CERN?
У Осла сабраліся больш за сто чалавек. Святлана звярнулася да беларускай дыяспары і падзякавала за барацьбу за дэмакратыю ў Беларусі:
«Удзячная беларускай дыяспары за актыўную працу за мяжой. Дзякуй за тое, што вы працуеце з нарвежскімі палітыкамі, амбасадамі, МЗС і «Yara» – гэта вялізная дапамога. Дзякуй за вашу працу з медыямі, за кніжны клуб і дні беларускага кіно – гэта неймаверна важна. Давайце працягнем нашу барацьбу да таго часу, пакуль усе людзі на нашай радзіме не стануць свабоднымі».
У Вроцлаве адбылася акцыя салідарнасці, прысвечаная Сцяпану Латыпаву. Падчас акцыі выступіў яго калега, які распавёў, хто такі Сцяпан. На плакатах з імёнамі палітвязняў, на жаль, дадаліся новыя імёны. Мы верым, што хутка законнасць і правы чалавека вернуцца ў Беларусь!
Перамога не за гарамі, прывітанне з Краснадарскага краю.
Прывітанне ад беларусаў Бразіліі.
МГМ belsat.eu