Актывісту анархічнага руху Ігару Аліневічу, якога асудзілі да 20 гадоў калоніі ўзмоцненага рэжыму, могуць змяніць умовы адбыцця пакарання. Пра гэта паведамляе ПЦ «Вясна».
Палітвязня этапавалі ў мазырскую калонію ў канцы траўня. Як адзначаюць праваабаронцы, з таго часу на яго бесперапынна аказваецца ціск: па надуманых прычынах яго ўтрымлівалі ў штрафным ізалятары 30 содняў, пасля чаго перавялі ў памяшканне камернага тыпу. Пры гэтым раней у зняволенні Ігара ніводнага разу не каралі ізалятарам.
Цяпер стала вядома, што 8 жніўня адбудзецца суд па ўзмацненню рэжыму і пераводзе Ігара ў турму. Справу будзе разглядаць суддзя Мазырскага раёна Валянціна Новікава.
Нагадаем, 22 снежня 2021 году ў Менскім абласным судзе агучылі прысуд па крымінальнай справе ў дачыненні да анархістаў. Суддзя Вячаслаў Тулейка прызначыў Ігару Аліневічу і Сяргею Раманаву па 20 гадоў калоніі, Дзмітрыю Разановічу – 19 гадоў калоніі, Дзмітрыю Дубоўскаму – 18 гадоў калоніі.
Анархістаў абвінавацілі ў падпале аддзелу ДАІ ў Мазыры, будынку Дзяржаўнага камітэту судовых экспертыз у Салігорску і аўтамабіляў каля будынку мясцовай пракуратуры восенню 2020 году. Ад гэтых дзеянняў ніхто не пацярпеў.
Глеб Нержын belsat.eu
