Агулам пад «зачыстку» трапіла не менш за 110 аб’яднанняў, установаў і фондаў.
Праваабарончы цэнтр «Вясна» паведаміў 5 жніўня аб ліквідацыі ўстановы развіцця традыцыйнага бортніцтва «Братэрства босых бортнікаў». Прычыну ліквідацыі не называюць.
«Братэрства босых бортнікаў» заснавалі ў кастрычніку 2017 года. Установа мела на мэце захаванне, папулярызацыю, развіццё традыцыйнага бортніцтва і забеспячэнне пераемнасці нацыянальнай аўтэнтычнай бортнай традыцыі.
Пчолаў вярталі ў звычайныя для іх умовы: лясы і балоты. Лясное бортніцтва дзяржава ўключыла ў спіс нематэрыяльна-культурных каштоўнасцяў Беларусі. У 2020 годзе супольная польска-беларуская намінацыя «Культура бортніцтва» пры ўдзеле «босых» прайшла ў Сусветны спіс нематэрыяльнай спадчыны UNESCO. Пра сваю дзейнасць «босыя» расказваюць на сайце Bortnictva.by.
Праваабаронцы тым часам налічылі 110 установаў, якія ўжо ліквідаваныя або чакаюць судоў аб ліквідацыі. У спісе – праваабаронцы, эколагі, асветнікі, бізнесоўцы і многія іншыя, нават асацыяцыя барацьбы са СНІД і прарасейскі «РуМол».
АА belsat.eu
