Паслы 30 краінаў NATO 5 ліпеня падпісалі пратаколы аб далучэнні Фінляндыі і Швецыі, паведамілі ў штаб-кватэры Паўночнаатлантычнага альянсу.
«Абедзве краіны афіцыйна пацвердзілі сваё жаданне і здольнасць выконваць палітычныя, юрыдычныя і вайсковыя абавязкі, прадугледжаныя сяброўствам у NATO», – гаворыцца ў пратаколе аб далучэнні да альянсу.
З гэтага моманту Швецыя і Фінляндыя могуць удзельнічаць ва ўсіх паседжаннях краінаў блоку, але пакуль не маюць права голасу.
Рашэнне аб прыёме Фінляндыі і Швецыі ў NATO мусіць быць ухваленае ўрадамі ўсіх 30 краінаў альянсу.
Швецыя і Фінляндыя на фоне вайны ва Украіне адмовіліся ад традыцыйнага нейтралітэту і падалі заявы на ўступленне ў Паўночнаатлантычны альянс. Працэдура прыёму дзвюх новых краінаў у NATO стартавала напрыканцы чэрвеня, калі прэзідэнт Турцыі Рэджэп Таіп Эрдаган зняў свае пярэчанні супраць далучэння Швецыі і Фінляндыі да альянсу. Швецыя і Фінляндыя пагадзіліся экстрадаваць у Турцыю меркаваных курдскіх экстрэмістаў і падазраваных у датычнасці да спробы путчу 2016 года ў Турцыі.
ЗК belsat.eu
