У Беларусі закрываюць карэспандэнцкі пункт «Еўрарадыё». Адпаведную пастанову зарэгістравалі ў рэестры Нацыянальнага прававога інтэрнэт-парталу Беларусі.
Пастанову Савету Міністраў Рэспублікі Беларусь «Аб закрыцці ў Рэспубліцы Беларусь карэспандэнцкага пункту таварыства з абмежаванай адказнасцю «Еўрапейскае радыё для Беларусі» (Рэспубліка Польшча)» прынялі 2 ліпеня 2021 года і ўлучылі ў Нацыянальны рэестр сёння, 5 ліпеня.
Галоўны рэдактар «Еўрарадыё» Павел Свярдлоў напісаў у сваім Facebook, што гэта было чаканае рашэнне.
Вось як рэдакцыя «Еўрарадыё» пракаментавала закрыццё свайго карпункту, заявіўшы што і далей будзе працягваць працаваць:
«Гэта, найхутчэй, адна з частак адказу беларускіх уладаў на санкцыі з боку Еўразвязу. Мы афіцыйна працавалі ў Менску 11 гадоў. Тое, што ўрад закрывае карпункт менавіта цяпер, пасля ўвядзення чацвёртага пакета і сектаральных санкцыяў − наўрад ці супадзенне.
Вядома, гэта паўплывае на нашу працу. Але не спыніць нас».
Згодна з заявай рэдакцыі, яны чакалі такога павароту падзеяў і рыхтаваліся да яго: «План ёсць, і не адзін. А таксама ёсць вялікі досвед працы на ўдалёнцы − дзякуй каронавірусу, як бы парадаксальна і іранічна гэта ні прагучала».
Карэспандэнцкі пункт «Еўрапейскага радыё для Беларусі» быў адкрыты ў Менску ў 2009 годзе.
У жніўні 2020-га ў Беларусі заблакавалі доступ да сайту «Еўрарадыё», а журналісты выдання з восені працавалі без акрэдытацыі. Цяпер жа рэдакцыя засталася і без офісу.
АД, belsat.eu
