Украінскаму журналісту Аляксандру Махаву было 36 гадоў. Ён працаваў на каналах «Україна» і «Україна 24», «Дом», ствараў падкасты «Ваенкар». Паведамляецца, што ён загінуў 4 траўня ў ваколіцах гораду Ізюм.
«Калісьці Махаў быў адзіным журналістам на борце эвакуацыйнага самалёта з каронавіруснага Ўу-Ханю», – піша «Україна 24».
Пра смерць журналіста Аляксандра Махава згадаў у сваім відэазвароце прэзідэнт Украіны Уладзімір Зяленскі.
«Упэўнены, вы бачылі ягоныя рэпартажы на тэлеканалах «Україна» і «Дом». Магчыма, бачылі ягоныя каментары, ягоныя паведамленні. Ён заўсёды быў такім – з уласнай пазіцыяй. Патрыятычнай і шчырай. І заўсёды без ганарыстасці.
І заўсёды быў сярод самых смелых, сярод першых. Заўсёды працаваў у самых гарачых пунктах. Імкнуўся прывезці сапраўдны матэрыял. Моцны матэрыял», – адзначыў Уладзімір Зяленскі.
У лютым 2022 года Махаў пайшоў на фронт удзельнічаць у баявых дзеяннях. 28 красавіка ён паведамляў аб тым, што паранены. 4 траўня стала вядома, што ён загінуў у ваколіцах гораду Ізюм.
З пачатку поўнамаштабнай вайны ва Украіне загінулі ўжо больш за 20 журналістаў.
ЗК belsat.eu
