Развітанне са Станіславам Шушкевічам, які сышоў з жыцця уначы з 3 на 4 траўня, пачнецца ў пятніцу 6 траўня ў Чырвоным касцёле ў Менску а 20-й гадзіне.
Цырымонія развітання працягнецца да 14:30 7 траўня. Пра гэта паведаміў у Facebook актывіст Сяргей Мельянец.
Першаму кіраўніку незалежнай Беларусі Станіславу Шушкевічу было 87 гадоў. Напрыканцы красавіка ён трапіў у рэанімацыю пасля перанесенага COVID-19. Праз два дні яго выпісалі з лякарні, але здароўе палітыка было падарванае хваробай.
Станіслава Шушкевіча паклалі ў рэанімацыйнае аддзяленне Рэспубліканскага клінічнага медычнага цэнтру Кіраўніцтва справамі прэзідэнта з прычыны наступстваў каронавірусу.
Месяц таму ён перахварэў на о-мікрон, пры тым што апошнія месяцы заставаўся ўдома, і кантакты былі зведзеныя да мінімуму.
Станіслаў Шушкевіч быў сябрам-карэспандэнтам Акадэміі навук, у 1991–1994 гадах – старшынём Вярхоўнага Савету 12-га склікання. Адзін з падпісантаў Белавежскага пагаднення, якое паставіла кропку ў існаванні СССР.
ЗК belsat.eu
