Міністэрства абароны Вялікай Брытаніі ў сваёй чарговай справаздачы сцвярджае, што раптоўнае правяранне сілаў рэагавання ў Беларусі, якое абвясцілі 4 траўня, «адпавядае сезоннай норме» і асаблівай пагрозы не нясе.
Паводле брытанскай выведкі, беларускія войскі сапраўды выходзяць з гарнізонаў, але ў гэтым няма нічога незвычайнага. Зазначаецца, што кульмінацыя зімовага цыклу вучэнняў у Беларусі надыходзіць у траўні. Адхіленняў ад звычайнай актыўнасці, якія б уяўлялі пагрозу, бліжэйшым часам не чакаецца.
Аднак, як мяркуюць выведнікі, ёсць высокая верагоднасць, што Расея паспрабуе раздзьмуць пагрозу, якую ствараюць для Украіны гэтыя вучэнні, – каб скаваць украінскія сілы на поўначы і перашкодзіць іх перакідванню для ўдзелу ў баях за Данбас.
У сваю чаргу Генштаб Збройных сілаў Украіны ў аператыўнай зводцы за 4 траўня паведаміў, што на тэрыторыі Гомельскай вобласці адбываецца нарошчванне сістэмы супрацьпаветранай абароны, праведзена трэнаванне падраздзяленняў радыёэлектроннай барацьбы.
Акрамя таго, адзначае ведамства, вайсковае камандаванне Украіны не выключае дэманстрацыйных і правакацыйных дзеянняў на беларуска-ўкраінскім памежжы.
Раніцай 4 траўня Міністэрства абароны Беларусі абвясціла пачатак «раптоўнага правярання сілаў рэагавання». Як паведамлялася, падчас вучэнняў воінскія часткі і падраздзяленні будуць адпрацоўваць «пытанні прывядзення ў баявую гатовасць, учынення маршу ў прызначаныя раёны і выканання вучэбна-баявых заданняў».
ЗК belsat.eu