«Яны хацелі забіваць людзей». Выйшла расследаванне пра злачынствы расейскіх наймітаў у Афрыцы
Французскае выданне «RFI» апублікавала расследаванне пра злачынствы расейскіх наймітаў у Цэнтральнаафрыканскай Рэспубліцы
Гаворка ідзе пра тры ваенізаваныя групоўкі, што ваююць у ЦАР на баку ўрадавай арміі: прыватная вайсквая кампанія Вагнэра ды ейныя філіялы «Sewa Security Services» і «Lobaye Invest SARLU». Агульная іх колькасць у краіне можа дасягаць 2000 чалавек.
Асноўнай крыніцай інфармацыі ў даследаванні стаў даклад адмысловай рабочай групы ААН аб выкарыстанні наймітаў у Афрыцы. Паводле яго, толькі са студзеня па сярэдзіну красавіка 2021 года расейскія ваенныя спецыялісты здзейснілі 26 пазасудовых пакаранняў смерцю, 5 групавых згвалтаванняў і 27 раз ініцыявалі незаконныя арышты з катаваннямі на допытах. Таксама на іх ліку незаконныя выкраданні людзей, непрапарцыйнае ўжыванне сілаў і г.д.
«Яны не спрабавалі высветліць, хто быў мяцежнікам, а хто цывільным. Яны хацелі забіваць людзей», – цытуе «RFI» сваю «крыніцу ў службах бяспекі».
Гэтак, згадваецца расстрэл у пачатку студзеня грузавіка з харчовымі таварамі, падчас якога загінулі трое мірных жыхароў, пакаранне ў сярэдзіне лютага трох мірных жыхароў у мячэці, групавое згвалтаванне 25 лютага 24-гадовай мясцовай жыхаркі.
«Я думала, расейцы тут для таго, каб нам дапамагаць», – распавядае 20-гадовая ахвяра масавага згвалтавання.
Сярод ахвяраў «шалёных куляў» ёсць дзеці і старыя.
МГ belsat.eu
