Герасіменя: Магчыма, Беларусь паедзе на Алімпіяду ў Токіа пад нейтральным сцягам

Аляксандра Герасіменя ў варшаўскай студыі «Белсат ТВ». 21 кастрычніка 2020 г. Фота: Яна Пракопчык / Белсат

Крымінальныя справы супраць кіраўніцтва Беларускага фонду спартовай салідарнасці могуць стаць прычынаю таго, што спартоўцы з Беларусі паедуць на Алімпіяду ў Токіа пад нейтральным сцягам. Пра гэта заявіла кіраўніца БФСС Аляксандра Герасіменя падчас стрыму ў Instagram фонду.

Трохразовая прызёрка Алімпійскіх гульняў заявіла, што дзеянні НАК Беларусі ды новыя крымінальныя справы могуць адыграць «вялікую ролю».

«Магчымае нават выключэнне Нацыянальнага алімпійскага камітэту з чальцоў МАК. Думаю, нашыя спартоўцы паедуць на Алімпіяду пад нейтральным сцягам. І гэта ўжо не нашая заслуга. Думаю, яны самі сабе санкцый дадаткова прыдбалі», – сказала Аляксандра Герасіменя.

У сваю чаргу выканаўчы дырэктар БФСС Аляксандр Апейкін заявіў, што ўлады Беларусі «зрабілі чарговы стрэл сабе ў нагу». Ён падкрэсліў, што «гэта крымінальная справа не супраць фізічных асобаў – Аляксандры Герасімені і Аляксандра Апейкіна. Гэта справа супраць БФСС, які прызнаецца суб’ектам міжнароднага спартовага права і ёсць чальцом алімпійскага руху».

Пры гэтым ён падкрэсліў, што задача БФСС – абараніць спартоўцаў ад «гэтага дзікунства ў беларускім спорце».

СК распачаў крымінальную справу супраць Аляксандры Герасімені

Супраць кіраўнікоў Беларускага фонду спартовай салідарнасці Аляксандры Герасімені і Аляксандра Апейкіна распачалі крымінальную справу за крытыку рэжыму Аляксандра Лукашэнкі. СК вінаваціць Герасіменю і Апейкіна ў распаўсюдзе «заведама непращдзивых звестак пра хаду і вынікі выбарчай кампаніі, пра падзеі ў сацыяльнай, эканамічнай, палітычнай і культурніцкай сферах жыцця грамадства».

У ведамстве сцвярджаюць, што дзеянні Герасімені і Апейкіна нанеслі дзяржаве «значную іміджавую і фінансавую шкоду, падарвалі прэстыж краіны на міжнароднай і палітычнай арэне, дыскрэдытавалі кіраўніцтва спартовай галіны і дзяржавы».

МГ belsat.eu

Hавiны