«Калі Расея будзе займацца неабдуманымі агрэсіўнымі дзеяннямі, мы будзем супрацьстаяць ім», – такую пазіцыю прэзідэнта Злучаных Штатаў пацвердзіў Блінкен.
Дзяржаўны сакратар ЗША Энтані Блінкен узяў удзел у глабальнай віртуальнай канферэнцыі «Reuters NEXT». Вялікая частка размовы была звязаная з Расеяй і яе магчымай атакай на Украіну.
Блінкен сказаў, што спадзяецца на тое, што Расея не стане ладзіць уварванне ва Украіну, але ЗША падзяляе занепакоенасць з саюзнікамі і партнёрамі аб магчымым аднаўленні Расейскай агрэсіі супраць Украіны. Тое, што бачылі ў апошнія тыдні, «вельмі-вельмі непакоіць», але ёсць рашучасць паказаць, што калі агрэсія адновіцца, «будуць вельмі сур’ёзныя наступствы».
Блінкен расказаў, што меў доўгую гутарку з расейскім міністрам замежных справаў – «вельмі-вельмі спадзяецца», што Расея яго пачула і абярэ дыпламатычны шлях, а не шлях канфрантацыі і агрэсіі. Найважней, каб Расея адвяла войскі ад украінскіх межаў, бо весці дыпламатыю, калі «пісталет прыстаўлены да чыёйсьці галавы», вельмі складана.
Адно з пытанняў было аб тым, ці ёсць «геапалітычная стратэгія» ў пагрозах Уладзіміра Пуціна вайной з Украінай, мігрантах на межах Беларусі і Еўразвязу, а таксама трубапровадам «Паўночны паток-2». Блінкен пагадзіўся: імаверна, ёсць.
«Тое, што мы бачым у Беларусі на межах трох краінаў, гэта сапраўды абуральнае выкарыстанне мігрантаў у якасці палітычнай зброі – гэта можа пасеяць хаос і нестабільнасць. І адначасова ўзмацненне ціску на Украіну, і так, энергетыка таксама , асабліва ў зімовы перыяд. Я думаю, што гэтыя рэчы звязаныя», – разважаў Блінкен.
Ён дадаў: важна тое, што ён чуў ад еўрапейскіх калегаў на самітах NATO і АБСЕ не толькі занепакоенасць адносна Расеі, але і рашучасць процістаяць ёй.
«Канфрантацыя не будзе ні ў чыіх інтарэсах, – падкрэсліў Блінкен. – Але прэзідэнт Байдэн асабліва ясна казаў прэзідэнту Пуціну, што мы хочам больш стабільных і прадказальных адносінаў, але таксама ён вельмі ясна сказаў, што калі Расея будзе ўдзельнічаць у неабдуманых, агрэсіўных дзеяннях, мы будзем супрацьстаяць ім».
Блінкен таксама згадаў, што за апошнія гады ўсё, што зрабіў Пуцін, «выклікала менавіта тое, што ён казаў, што хоча перадухіліць».
АА belsat.eu