Блакаванне «Комсомольской правды»: Пяскоў паскардзіўся, што ў Менску не чуюць Крэмль
Крэмль выразна пазначыў сваю пазіцыю адносна блакавання «Комсомольской правды в Беларуси» і чакае яе адмены. Пра гэта 4 кастрычніка заявіў прэс-сакратар прэзідэнта РФ Дзмітрый Пяскоў.
«Мы дакладна пазначылі нашу пазіцыю адносна абмежаванняў у дачыненні да нашага выдання – нашай «Комсомольской правды». Мы з гэтым не згодныя і ўсё ж такі чакаем адмены гэтых абмежаванняў і забеспячэння свабоднай працы нашага паважанага выдання на тэрыторыі саюзнай нам Беларусі», – сказаў Пяскоў, піша РИА Новости.
Пакуль, паводле яго, няма адчування, «што нас чуюць, таму што па-ранейшаму дзейнасць «Комсомольской правды» ў Беларусі зараз закрытая».
Сайт «КП в Белоруссии» ўлады заблакавалі 29 верасня. Паводле Міністэрства інфармацыі, прычыны такой захады – у парушэнні заканадаўства. Раней «Комсомолка» адрэагавала на падзеі 28 верасня ў сувязі з забойствам супрацоўніка КДБ і праграміста Зельцара ды апублікавала каментар аднакласніцы забітага Андрэя Зельцара.
Журналіст Генадзь Мажэйка, які апублікаваў каментар, быў затрыманы 1 кастрычніка ў Маскве і змешчаны ў менскі ізалятар.
МГ belsat.eu
