ПЦ «Вясна»: у жніўні па палітычных матывах у Беларусі былі затрыманыя 387 чалавек

Улады Беларусь працягваюць актыўна ўжываць крымінальны і адміністратыўны пераслед грамадзян паводле палітычных матываў, у тым ліку за антываенныя выступы. Пра гэта гаворыцца ў справаздачы па сітуацыі з правамі чалавека ў Беларусі за жнівень 2022 году, якую падрыхтаваў Праваабарончы цэнтр «Вясна».

«Крымінальны пераслед апанентаў улады, удзельнікаў пратэсных выступаў і іншадумцаў па-ранейшаму застаецца запатрабаванай уладамі формай рэпрэсій.

Масавы і паўсюдны характар адвольнага пазбаўлення свабоды, непрыкрытая палітычная матывацыя, уцягванне ў гэты працэс следчых, пракурораў і суддзяў вызначае характар цяперашніх падзей і дазваляе ацэньваць іх як злачынства супраць чалавечнасці», – падкрэслівае ПЦ «Вясна». 

Аўтары дакладу канстатуюць, што колькасць палітвязняў у Беларусі працягвае павялічвацца. За жнівень праваабарончая супольнасць прызнала палітзняволенымі яшчэ 92 чалавекі.

Паводле праваабаронцаў, за жнівень па палітычных матывах былі затрыманыя не менш за 387 чалавек. ПЦ «Вясна» вядома пра 162 судовыя працэсы паводле адміністратыўных артыкулаў і пра рашэнні суддзяў па 76 з іх (былі прызначаны 43 арышты і 33 штрафы).

«Праваабаронцы і журналісты працягваюць фіксаваць шматлікія факты жорсткага абыходжання ў дачыненні да грамадзян, пазбаўленых волі паводле палітычных матываў, затрыманых і асуджаных да адміністратыўнага арышту за ўдзел у мірных сходах.

Наўмысна створаныя адміністрацыяй ЦІП, ІЧУ і іншых месцаў зняволення нялюдскія ўмовы ўтрымання для дадзенай катэгорыі арыштаваных расцэньваюцца экспертамі ПЦ «Вясна» як катаванні», – падкрэсліваецца ў справаздачы.

• З лета 2020 года ў Беларусі адбываюцца самыя масавыя рэпрэсіі ў найноўшай гісторыі. За гэты час ва ўсёй краіне следчыя органы распачалі больш за 11 000 крымінальных справаў, звязаных з пратэстамі і іншадумствам. На дзень 4 верасня 2022 года праваабаронцы прызналі палітычнымі вязнямі 1322 асобы.
• З лета 2020 года тысячы беларусаў па ўсёй краіне сталіся ахвярамі мэтанакіраваных катаванняў, дзясяткі тысяч чалавек прайшлі праз палітычна матываваныя адміністратыўныя затрыманні. Згодна з рознымі ацэнкамі, у выніку палітыкі дзяржаўнага тэрору загінулі ад 4 да 20 асобаў. Пры гэтым ні за катаванні, ні за забойствы іншадумцаў да адказнасці нікога не прыцягнулі.

Глеб Нержын belsat.eu