І Павел Латушка, і Дзмітрый Шчыгельскі, і Вадзім Пракоп’еў, і Франак Вячорка, і Вераніка Цапкала… І «адкрыты мікрафон».
У Вільні 8-9 жніўня пройдзе канферэнцыя «Новая Беларусь», якую ладзіць штаб Святланы Ціханоўскай, Каардынацыйная рада, Народнае антыкрызіснае ўпраўленне, каманда Віктара Бабарыкі, аб’яднанне былых сілавікоў BYPOL, рух «Супраціў» і іншыя праціўнікі рэжыму Аляксандра Лукашэнкі. 4 жніўня з’явілася падрабязная праграма канферэнцыі. Будзе онлайн-трансляцыя.
Ціханоўская ў абодва дні зачытае ўступныя словы і падвядзе вынікі.
У першы дзень (8 жніўня) запланаваныя чатыры дыскусіі:
- «Якімі павінны быць стратэгіі выхаду з крызісу?». Удзельнічаюць дарадца Ціханоўскай Аляксандр Дабравольскі, прадстаўнік BYPOL Аляксандр Азараў, кіраўнік НАУ Павел Латушка і прадстаўнік палка «Пагоня» Вадзім Пракоп’еў.
- «Якім павінен быць транзітны перыяд і хто мусіць адказваць за яго?». Удзельнічаюць намеснік кіраўніка НАУ Уладзімір Астапенка, прадстаўнік BYPOL Алег Талерчык, прадстаўнік Ціханоўскай Анатоль Лябедзька, эканаміст Леў Львоўскі.
- «Як стварыць умовы для годнага жыцця і выратаваць краіну ад эканамічнага крызісу?». Удзельнічаюць сябра эканамічнай рады Офісу Ціханоўскай Ірына Сазановіч, эканаміст Дзмітрый Крук, прадстаўнік «Рабочага руху» Юрый Рававы.
- «Як рэарганізаваць дэмакратычныя сілы?». Удзельнічаюць сябра прэзідыуму Каардынацыйнай рады Вольга Кавалькова, прадстаўнік НАУ Валер Мацкевіч, дарадца Ціханоўскай Франак Вячорка, кіраўніца Беларускага жаночага фонду Вераніка Цапкала (жонка і лідарка перадвыбарчага штабу Валерыя Цапкалы), чалец каманды Бабарыкі Іван Краўцоў.
Пасля дыскусіяў і пытанняў з залы запланаваныя нефармальныя абмеркаванні.
У другі дзень (9 жніўня) запланаваныя чатыры сесіі:
- Пасля ўступнага слова Ціханоўскай – пытанні і адказы ў фармаце «адкрытага мікрафону». Ціханоўская кажа, гэты пункт быў ейнай просьбай.
- «Прыярытэты беларускага бізнесу» – каардынуе заснавальніца «Imaguru» Таццяна Марыніч.
- «Лічбавая дэмакратыя» – каардынуе прадпрымальнік Аляксандр Кныровіч.
- «Прыярытэты грамадзянскай супольнасці» – каардынуюць лідарка ініцыятывы «Сумленныя людзі» Алена Жываглод і эксперт па грамадзянскай супольнасці Уладзімір Корж.
Пасля фінальнага слова Ціханоўскай запланаваная ўрачыстая цырымонія ў цэнтры Вільні. Вынікі канферэнцыі і прапановы з яе абяцаюць апублікаваць на асобнай старонцы сайта Conferencenewbelarus.org.
На форум запрашаюць ахвочых абмеркаваць далейшыя планы супрацьстаяння рэжыму Лукашэнкі. Але асобным адмаўляюць: так, на адмову паскардзіўся сузаснавальнік руху «Legalize Belarus» Пётр Маркелаў, які падаваў заяўку як рэгіянальны дырэктар «Students For Liberty for Eastern Europe». Для Веранікі Цапкалы патрабавалі «роўных умоваў», а не проста выступу на адной з дыскусіяў.
Перад канферэнцыяй збіраюць меркаванні аб тым, што трэба змяніць у дзейнасці дэмакратычнай супольнасці – анкету можна запоўніць у тым ліку тым, хто не зможа выехаць з Беларусі.
Алесь Наваборскі belsat.eu
