Гэта казкі братоў Грымаў. Кіраўніца МУС Літвы пра смерць іракца на беларуска-літоўскай мяжы
Міністарка ўнутраных справаў Літвы Агне Білатайце заявіла, што паведамленні афіцыйных ведамстваў пра смерць іракца на мяжы з Літвой – дэзынфармацыя, але падобных паведамленняў можа стаць больш, піша Delfi.lt.
4 жніўня раніца Дзяржаўны памежны камітэт Беларусі паведаміў, што ўначы з 3 на 4 жніўня на беларуска-літоўскім памежжы, каля вёскі Беняконі, беларускія памежнікі знайшлі грамадзяніна Іраку ў цяжкім стане, неўзабаве ён памёр.
«Мы можам гэта пракаментаваць як відавочную дэзынфармацыю. Супраць Літвы вядзецца гібрыдная атака, і распаўсюд дадзенай дэзынфармацыі – прыклад гэтага, – сказала міністарка. – Гэта бздура, казкі братоў Грымаў».
Як правакацыю з боку Беларусі навіну пра смерць іракца ацаніў міністр абароны Літвы Арвідас Анушаўскас.
«Мы чакалі правакацыяў ад рэжыму Беларусі. Насамрэч, арганізаваўшы гэты нелегальны шлях, уцягнуўшы ў гэтую дзейнасць сваіх памежнікаў, думаю, яны і самі не заўсёды кантралююць сітуацыю», – зазначыў міністр.
Паводле Агне Білатайце, падобных паведамленняў хутка можа пабольшаць.
«Мы можам чакаць розных выдуманых гісторыяў, бо гэта і ёсць мэтаю – скампраметаваць нас, нашых памежнікаў, Літву», – кажа міністарка ўнутраных справаў.
На пытанне, ці даводзілася літоўскім памежнікам ужываць сілу, Білатайце адказала, што сілу выкарыстоўваюць супраць нелегальных мігрантаў толькі ў тым выпадку, калі гэта неабходна.
У Літву праз Беларусь незаконным шляхам цягам 2021 года трапілі 4090 чалавек, пераважна гэта грамадзяне Іраку.
ГГ, belsat.eu
