У выніку сутычак сілавікоў і пратэстоўцаў у сталіцы аўтаномнай рэспублікі Каракалпакстан Нукусе загінулі 18 асобаў. Пра гэта заявілі ў Генпракуратуры Узбекістану, паведамляе «Радыё Свабода».
Паводле Генпракуратуры, усяго пацярпелі 243 асобы, у тым ліку 38 сілавікоў. 18 асобаў памерлі ад атрыманых траўмаў.
Цяпер у шпіталях праходзяць лячэнне 94 пацыенты, некаторыя з іх у крытычным стане, у тым ліку супрацоўнікі праваахоўных органаў.
Цягам 1–2 ліпеня былі затрыманыя 516 грамадзянаў. Праваахоўныя органы паведамляюць, што ў дачыненні затрыманых вядуцца следчыя дзеянні, частку з іх дапытваюць.
Паводле выдання «Газета.uz», у Нукусе амаль суткі грымелі выбухі святлошумавых сродкаў і стрэлы, але цяпер сітуацыя ў горадзе спакойная. На вуліцах відаць гарэлыя шыны, гільзы, кавалкі шашак і гранатаў, а таксама сляды крыві. Людзі шукаюць родных сярод забітых і затрыманых.
Маштабныя пратэсты ў Каракалпакстане пачаліся 1 ліпеня пасля публікацыі праекту паправак да Канстытуцыі. Новая рэдакцыя была вынесеная на грамадскае абмеркаванне 26 чэрвеня. У ёй выключаецца суверэнітэт Рэспублікі Каракалпакстан і права яе насельніцтва на аддзяленне на аснове ўсеагульнага рэферэндуму. Пад уплывам вулічных пратэстаў улады краіны паабяцалі скасаваць папраўкі пра адмену аўтаноміі.
Разам з тым, улады Узбекістану абвінавацілі пратэстоўцаў у масавых беспарадках і спробе захапіць уладу. На падставе факту вулічных дэманстрацыяў у Нукусе 2 ліпеня Генеральная пракуратура Узбекістану распачала крымінальную справу паводле артыкулу «Змова з мэтай захопу ўлады або зрынання канстытуцыйнага ладу» (караецца пазбаўленнем волі ад 10 да 20 гадоў).
У Каракалпакстане быў уведзены рэжым надзвычайнага становішча і каменданцкая гадзіна. У рэгіёне быў абмежаваны інтэрнэт і закрыты пункт пропуску на мяжы з Казахстанам.
Глеб Нержын belsat.eu