Беларускі палітолаг Валер Карбалевіч у сваім тэлеграм-канале пракаментаваў афіцыйныя звесткі пра нібыта замах на дзяржаўнага прапагандыста Рыгора Азаронка.
Валер Карбалевіч адзначыў, што «задума выглядала сумнеўнай з самага пачатку», бо «схапіць, скруціць, запіхнуць у багажнік здаровага маладога мужчыну, двух чалавек-нападнікаў відавочна недастаткова». Ён нагадаў, што «сам Лукашэнка прызнаў, што гэта была аперацыя спецслужбаў».
Палітолаг падкрэсліў, што вядомае толькі прозвішча аднаго нападніка, а твар іншага нават не паказваецца, а ў самой іх машыне ўсталяваная відэакамера.
«Усё гэта моцна нагадвае аперацыю супраць змоўшчыкаў, якіх арыштавалі ў Маскве (Фядута, Зянковіч). Спецслужбы падстаўляюць свайго чалавека, які правакуе пэўных людзей на супрацьпраўны акт. А потым КДБ рапартуе аб бліскучай аперацыі, БТ апавядае пра злосных тэрарыстаў. На гэтай падставе Лукашэнка «даручыў праваахоўным органам правесці, груба кажучы, зачыстку па ўсёй краіне», – заявіў Валер Карбалевіч.
2 ліпеня Лукашэнка заявіў, што ў Беларусі следчыя вывілі тэрарыстычныя ячэйкі, якія чакаюць свайго часу. Паводле яго напярэдадні ноччу яны напалі на вядоўцу дзяржтэлеканалу СТВ Рыгора Азаронка. Відэа інцыдэнту, апублікаванае 3 ліпеня, выклікала толькі больш пытанняў.
МГ belsat.eu